Ер аҳолиси меъёридан ошди: олимлар хавотир билдирмоқда

Сўнгги илмий тадқиқотлар Ер аҳолиси сони сайёра имкониятларидан ошиб кетганини кўрсатмоқда. Бу ҳақда Environmental Research Letters журналида чоп этилган мақолада батафсил маълумот берилган.

Тадқиқот давомида олимлар “сиғим қобилияти” деб аталувчи концепциядан фойдаланган. Ушбу ёндашув сайёра ресурсларига зарар етказмаган ҳолда қанча аҳоли яшаши мумкинлигини аниқлашга хизмат қилади. Ҳисоб-китобларга кўра, оптимал кўрсаткич тахминан 2,5 миллиард кишини ташкил этади. Айни пайтда эса Ер юзидаги аҳоли сони 8 миллиарддан аллақачон ошиб кетган.

Мутахассислар фикрича, бундай кескин ўсишнинг асосий сабаби — қазиб олинадиган ёқилғилардан кенг фойдаланишдир. Бу жараён бир томондан турмуш даражасини оширган бўлса, бошқа томондан ресурслардан ҳаддан ташқари фойдаланишга олиб келган. Натижада қисқа муддатли фойда узоқ муддатли барқарорлик эвазига қўлга киритилган.

Шунингдек, углеводородларга бўлган қарамлик экологик муаммоларни янада кескинлаштираётгани таъкидланмоқда. Бу ҳолат иқлим ўзгаришларига ҳам сезиларли таъсир кўрсатмоқда.

Олимлар прогнозига кўра, аҳоли сони келгуси йилларда ҳам ўсишда давом этади. Тахминларга қараганда, XXI асрнинг иккинчи ярмига бориб Ер аҳолиси 11–12 миллиард кишига етиши мумкин. Бу эса глобал ресурслар, экология ва барқарор ривожланиш масалаларини янада долзарб қилиб қўймоқда.