“Бу менинг онам” қўшиғи машҳурлик учун айтилмаган, — Малика Равшанова

“Бу менинг онам” қўшиғи билан кенг эътирофга сазовор бўлган хонанда Малика Равшанова навбатдаги суҳбатда ўз ҳаёти, ижоди ва шахсий кечинмалари ҳақида очиқ фикр билдирди. У 35 ёшида халқ орасида танилгани, санъат йўли осон кечмагани ва орзулари қандай амалга ошгани ҳақида гапирди.

Малика учун ушбу қўшиқ машҳурлик учун эмас, балки ички туйғуларнинг ифодаси сифатида яралган. Унинг айтишича, бу орзу отасининг истаги билан боғлиқ бўлиб, она ҳақида қўшиқ куйлаш истаги йиллар давомида юрагида яшаб келган. Ниҳоят, уч фарзандли бўлганидан сўнг, 35 ёшида ушбу ният амалга ошган.

Ижод йўли ҳам осон кечмаган. У бир суратга олиш жараёнида уч кун навбат кутишга мажбур бўлгани, айнан шу ҳолат унда қаттиқ из қолдирганини айтади. Ўша куни у ҳурмат фақат танилганлик билан ўлчанмаслигини англаб етган.

Хонанда болалигида шифокор бўлишни орзу қилганини ҳам яширмайди. Аммо ҳаёт уни санъат йўлига олиб чиққан. Бугун эса унинг ўғли айнан шифокорлик касбини танлаган.

Малика учун энг оғриқли нуқта — отаси унинг бугунги ютуқларини кўра олмаганидир. Шу ҳис туфайли яратилган қўшиқ унинг энг шахсий ва оғир ижодий ишларидан бири бўлиб қолган.

Унинг фикрича, ҳақиқий бахт — исминг эмас, қўшиғинг ёки ижодинг одамлар хотирасида қолишидир.