Британия Трамнинг Хўрмуз бўғозини блокада қилиш миссиясидан чекинди
Буюк Британия АҚШ томонидан таклиф этилган Хўрмуз бўғозидаги эҳтимолий блокада операциясида иштирок этишдан воз кечди. Бу ҳақда Sky News телеканали ўз манбасига таяниб хабар тарқатди.
Маълумотларга кўра, Вашингтон томонидан илгари сурилган ташаббус денгиз йўлларида хавфсизликни таъминлаш ва стратегик аҳамиятга эга бўлган Хўрмуз бўғозида ҳаракат эркинлигини назорат қилишга қаратилган эди. Бироқ Лондон бу операциядан четда қолишни маъқул кўрди.
Аввалроқ АҚШ президенти Доналд Трамп Британия томонидан минтақадаги денгиз йўлларини миналардан тозалаш учун ҳарбий кемалар жўнатилиши мумкинлигини билдирган эди. Бу эса халқаро майдонда катта муҳокамаларга сабаб бўлди.
Sky News манбаси Британия ҳукумати позициясини изоҳлар экан, Лондон халқаро денгиз қатнови эркинлигини қўллаб-қувватлашда давом этишини таъкидлади. Шу билан бирга, улар глобал иқтисодиёт барқарорлиги ва энергия таъминоти узлуксизлиги муҳим эканини қайд этган.
Британия шунингдек Франция ва бошқа ҳамкор давлатлар билан биргаликда кенг коалиция шакллантириш устида ишлаётгани маълум қилинди. Ушбу иттифоқнинг асосий мақсади — денгиз йўллари хавфсизлиги ва ҳаракат эркинлигини ҳимоя қилиш.
Трамп эса аввалроқ АҚШ ва Эрон делегациялари ўртасида бўлиб ўтган музокаралардан сўнг Хўрмуз бўғозига нисбатан қатъий чоралар кўрилишини билдирган эди. Унинг таъкидлашича, АҚШ ҳарбий-денгиз кучлари ушбу ҳудуддан ўтадиган барча кемалар ҳаракатини қаттиқ назорат остига олади.
Ҳозирча вазият кескинлигича қолмоқда. Халқаро ҳамжамият эса ушбу стратегик йўлак атрофидаги ҳар қандай кескинлашув глобал энергетика бозорига жиддий таъсир кўрсатиши мумкинлигини таъкидламоқда.