Жаҳон автосаноатида янги лидер: Хитой биринчи ўринга чиқди
Жаҳон автомобилсозлик саноати ўзининг янги даврига қадам қўймоқда. 2025 йил якунларига кўра, Хитой биринчи марта автомобиль савдоси бўйича жаҳонда етакчи ўринни эгаллаб, Японияни ортда қолдирди.
Япониянинг Nikkei нашри маълумотларига кўра, япон автоишлаб чиқарувчиларининг умумий савдоси 25 миллион автомобилгача тушган бўлса, хитой компаниялари деярли 27 миллион автомобиль сотишга муваффақ бўлди.
Электромобилларга тўлиқ ўтиш
Хитой автосаноатининг ўсишида электромобиллар экспортининг сезиларли ортиши муҳим омил бўлди. 2025 йилда янги энергия манбаларидаги автомобиллар экспорти 3,43 миллион донага етиб, 70 фоизга ўсди ва умумий етказиб беришнинг 41 фоизини ташкил этди.
Молиявий барқарорлик ва миқёс самараси
2025 йилда бир қатор хитой электромобиль ишлаб чиқарувчилари биринчи марта фойдага чиқди. Жумладан, дунёнинг энг йирик аккумулятор ишлаб чиқарувчиларидан бири бўлган CATL компанияси ҳам сезиларли фойда кўрсаткичларини қайд этди.
Анъанавий автоконцернларга босим
Хитойнинг кучайиб бораётган мавқеи фонида Европа, АҚШ ва Япониянинг йирик автоконцернлари тобора кўпроқ қийинчиликларга дуч келмоқда. Nissan савдоси пасайиб бормоқда, Toyota фойда камайишини прогноз қилмоқда, Ford эса электромобиллар сегментида зарар кўтармоқда.
Янги рақобат мантиғи
Глобал рақамлаштириш ва электрлаштириш фонида автомобиль фақат транспорт воситаси бўлишдан чиқиб, юқори технологияли платформага айланмоқда. Мутахассислар таъкидлашича, келажакда етакчилик нафақат ишлаб чиқариш ҳажми, балки инновацияларни жорий этиш қобилияти билан белгиланади.