Чемпионлар лигасидан чиққач Арбелоа “Реал” келажаги ҳақида очиқ гапирди

“Реал” бош мураббийи Альваро Арбелоа жамоа Чемпионлар лигаси чорак финалида “Бавария”га умумий ҳисобда 4:6 мағлуб бўлиб, мусобақани тарк этгач, ўз келажаги ва мураббийлик фалсафаси ҳақида очиқ фикр билдирди.

Арбелоа ўз сўзларида мураббийлик лавозимига келганидан бери ҳеч қачон кимгадир ўзини исботлашни асосий мақсад қилмаганини таъкидлади. Унинг айтишича, у учун энг муҳим нарса — майдондаги футболчиларга максимал даражада ёрдам бериш ва жамоани ривожлантириш бўлган:

— "Бу лавозимни эгаллаганимдан бери мураббий сифатида ўз даражамни кимгадир исботлашни мақсад қилмаганман. Мен ҳеч қачон ўйинларни айнан қарорларим билан ютишни истамаганман, асосий мақсадим майдондаги футболчиларга ёрдам бериш бўлган", — деди Арбелоа.

У шунингдек, “Бавария” (Венсан Компани), “Манчестер Сити” (Пеп Гвардиола) ва “Атлетико” (Диего Симеоне) каби Европанинг энг кучли клубларига қарши ўйинларни мисол қилиб келтирди. Унинг фикрича, бу жамоаларнинг ҳар бири ўз мураббийи услубини аниқ акс эттиради:

— "Биз Венсан Компани бошқараётган "Бавария", Пеп Гвардиола қўл остидаги "Манчестер Сити", Диего Симеоне раҳбарлигидаги "Атлетико" каби кўплаб кучли жамоаларга қарши ўйнадик. Менимча, Европадаги аксарият жамоалар ўз мураббийининг услубини акс эттиради", — деди Арбелоа.

Арбелоа Европа майдонларидаги аксарият жамоаларда мураббийнинг таъсири катта эканини айтди, бироқ ўзининг “Реал”даги таъсири қай даражада бўлганини аниқ баҳолаш қийинлигини ҳам тан олди. У ҳатто бу таъсир баъзи йирик клубларникига қараганда камроқ бўлиши мумкинлигини инкор этмади:

— "Менинг таъсирим жамоамда қай даражада кўрингани ёки бунинг улуши қанча бўлганини аниқ билмайман. Эҳтимол, бу мен юқорида мисол келтирган жамоаларга нисбатан анча камроқдир", — деди Арбелоа.

Шу билан бирга, у “Кастилья”да ишлаган даврига нисбатан ҳам фарқлар борлигини қайд этди ва ҳар бир босқич ўзига хос тажриба берганини таъкидлади:

— "Балки бу таъсир мен "Кастилья"да ишлаган пайтдагидан ҳам пастроқ бўлгандир. Мен ҳар доим клубга қўлимдан келганча ёрдам беришга ҳаракат қилганман ва бу охиригача шундай давом этади", — деди Арбелоа.

Якунда Арбелоа ҳар доим клуб манфаати учун бор кучини берганини ва бу йўлда ҳали ҳам тўлиқ садоқат билан ишлашда давом этишини билдирди.