Россия VPN орқали давлат хизматларидан фойдаланишни чеклади

Россия Рақамли ривожланиш вазирлиги мамлакатдаги онлайн хизматлар ва давлат платформалари нима сабабдан VPN ёқилган ҳолатда ишламаётганига изоҳ берди. Вазирлик маълумотларига кўра, аксарият маҳаллий сервислар фойдаланувчилар хавфсизлигини таъминлаш мақсадида бундай чекловларни жорий этган. Бу ҳақда Ixbt.com хабар беради.

Айниқса, фуқароларнинг шахсий маълумотлари қайта ишланадиган давлат платформаларида хавфсизлик талаблари юқори ҳисобланади. Мутахассисларнинг таъкидлашича, кўплаб VPN хизматлари конфидентсиалликни кафолатламайди ва улардан кибержиноятчилар трафикни қўлга киритиш учун фойдаланиши мумкин.

Ҳозирда Россия ҳукумати фуқаролар орасида VPNъдан фойдаланиш даражасини пасайтириш чораларини кўрмоқда. IT-компанияларни ушбу хизматларга киришни ёпишга ундаш учун турли имтиёзлардан маҳрум қилиш, жумладан, солиқ имтиёзлари берувчи аккредитацияни бекор қилиш масалалари муҳокама қилинмоқда.