«Атлетико» билан ўйин олдидан «Арсенал» майдондаги майсани ўлчашни сўради

«Арсенал» клуби Чемпионлар лигаси ярим финали доирасидаги «Атлетико»га қарши ўйин олдидан УЕФА расмийларига кутилмаган сўров билан чиқди. Лондонликлар Мадриднинг «Метрополитано» стадионидаги майдон ўти баландлигидан шубҳаланиб, уни расман ўлчашни талаб қилишди. Бу ҳақда Goal.com хабар беради.

Журналист Гилем Балагуенинг сўзларига кўра, «Арсенал» вакиллари ўйинолди машғулот вақтида майдон ҳолатидан норози бўлишган. Улар Диего Симеоне рақиб ўйинини бузиш учун махсус усуллардан фойдаланган деб ҳисоблаб, УЕФА инспекторларини майсани текширишга чақиришган.

Текширув натижасида майса баландлиги 26 миллиметр экани аниқланди. Регламентга кўра, майса баландлиги 21 дан 30 миллиметргача бўлиши рухсат этилган, шунинг учун УЕФА ҳеч қандай қоидабузарлик топмади.

Аввалроқ «Барселона» ва «Тоттенхэм» клублари ҳам ушбу стадиондаги майса ҳолати бўйича шикоят қилишган эди.

Мадридда кечган муросасиз баҳс 1:1 ҳисобидаги дуранг билан якунланди. Виктор Гёкерес пенальтидан ҳисобни очган бўлса, мезбонлардан Хулиан Алварес жавоб голини урди.

Энди жамоалар ўртасидаги жавоб учрашуви Лондондаги «Эмирейтс» стадионида бўлиб ўтади.