«Ашыгыч ярдәм» машинасына кадәр кар көртләреннән сөйрәп алып барган әби үлгән
Пермь өлкәсенең Гремячинск шәһәрендә яшәүче әбине «ашыгыч ярдәм» машинасына кадәр кар көртләреннән сөйрәп алып барганнар. Ул вафат булган. Бу турыда «Вести» каналы хәбәр итте.
Кар күп яву сәбәпле, 93 яшьлек хатын-кызны, махсус җәймәгә салып, көртләр өстеннән сөйрәп алып барырга туры килгән.
Төбәк Сәламәтлек саклау министрлыгы белешмәсе буенча, пациентка вакытында ярдәм күрсәткәннәр, аны хастаханәгә китергәннәр.
«Табиблар тырышлыгына карамастан, ул соңрак хастаханәдә үлде», – дигәннәр ведомствода.
Өлкән яшьтәге хатын-кызны кар көртләре өстеннән сөйрәп барган мизгелне видеога төшереп, социаль челтәрләрдә тараткан булганнар. Урамда кар күп булу сәбәпле, «ашыгыч ярдәм» машинасы өй янына килә алмаган, диелә хәбәрдә.