Նոր միջնորդություն է ներկայացվել՝ երկարացնելու Ավետիք Չալաբյանի կալանքը

Փաստաբանական խումբը տարածել է հաղորդագրություն, որում, մասնավորապես, ասված է.

«Դատավարական ղեկավարում իրականացնող դատախազը վարույթի նյութերը վերադարձրել է նախաքննության մարմնին՝ նախաքննությունը շարունակելու ցուցումով։ Ավելին, հապճեպ կարգով միջնորդություն է ներկայացվել դատարան` կալանավորումը երկարացնելու համար:

Դատախազը նույնպես գտել է, որ Չալաբյանի մեղքն ապացուցող փաստական տվյալներ քրեական գործի շուրջ 750 թերթից բաղկացած նյութում պարզապես գոյություն չունեն։

Այս իրավիճակում ՀՀ քննչական կոմիտեն որոշել է շարունակել նախաքննությունը Ավետիք Չալաբյանի անազատության շարունակականության հաշվին եւ նրա նկատմամբ կիրառված կալանքի ժամկետը երկարաձգելու վարույթ հարուցելու միջնորդություն է ներկայացրել դատարան։ Սա այն պարագայում, երբ Չալաբյանի կալանավորման ամբողջ ընթացքում մեր կողմից ներկայացվել են բազմաթիվ քննչական գործողություններ կատարելու վերաբերյալ մի շարք միջնորդություններ, որոնք անտեսվել ու մերժվել են վարույթն իրականացնող մարմնի կողմից»: