Казанда «Ханума» кафесын бүлешәләр: Гүзәл ханым 15ләп ир-ат белән талаша

Казанда гадәти булмаган вакыйга турында хәбәр таралды: эшмәкәр Гүзәл Вәлиеваның «Ханума» кафесына якынча 15 ир-ат килеп кергән һәм аның чыгып китүен таләп иткән. Бу сүз көрәшен дизайнер, ресторатор, отельер Гүзәл ханым туры эфирда күрсәтте.

Эшмәкәр бу күренешне 90нчы елларга тиңли, рейдерлык (кешенең күчемсез милеген көч куллану ысулы белән талап алу – ред.) дип атый.

Ике як та үзенең хаклы булуын әйтә: Гүзәл Вәлиева бу ир-атлардан нинди вәкаләтләр нигезендә эш итүләрен, документларын сорый, ир-атлар аның аренда вакыты узуын, аренда өчен беркайчан да акча түләнмәвен, шуңа күрә кафедан аның чыгып китәргә тиешлеген сөйли, документлар (түләү булмавы турында дип аңлашыла) күрсәтә.

Гүзәл Вәлиева, түләү документларын күрсәтү өчен, аларның кем икәнен сорый, оешма белән төзелгән ышанычнамәне күрсәтүләрен таләп итә. «Мин бит кемгә документлар күрсәтүемне белергә тиеш», – ди эшмәкәр.

Каршы як аннан бу бинада нинди документлар нигезендә эшләвен сораша.

Сүз көрәше барышында дин темасы да күтәрелә, «сез бит – мөслимә, дөресен сөйләгез» ди ирләрнең берсе.

Гүзәл Вәлиева ирнең мәктәптә начар укуын әйтә: «Мин сезгә тормышны өйрәтәм», – дип тә өсти.

Ир-атлар шәхси мәгълүматларын камерага күрсәтүдән баш тарта. Камерага төшерүчегә якын бармаска, дип килешәләр. Гүзәл Вәлиева: «Сез бит «никто», – ди.

Эшмәкәр бу ир-атларны 90нчы еллардагы җинаятьчел төркемнәре вәкилләре булырга мөмкин булуын әйтә. «Кем икәнлегегезне беләбез, сезне бөтенегезне дә бетерделәр, дип уйлаган идем, яртыгызны утырттылар, дип белә идем, юк, терелгәннәр. Егетләр, оешкан җинаятьчел төркем – куркыныч, йогынты ясый торган әйбер, чөнки Казанда җинаятьчел төркемнәр беркайчан да бетмәячәк, мәсәлән», – ди ул.

Бу сүз каршы якның ачуын чыгара. «Яла яккан өчен соңрак җавап бирерсез», – дип кисәтә аны бер ир-ат һәм ул үзенең дә камерага төшереп баруын белдерә.

Гүзәл ханым аның туры эфирларын караучыларга: «Кызлар, бизнес белән шөгыльләнәсегез килә икән, мондый кешеләр белән аралашырга әзер торыгыз. Мин алардан куркаммы? Әлбәттә, мин алардан курыкмыйм», – дип сөйли. «Кызлар, бу – «риск», бу – бизнес», – дип тә өстәп куя.

Соңрак Гүзәл Вәлиева бинага полиция килүен, бу ир-атларның таралышуын, җинаять эше ачылачагын, үзен начар хис итүен хәбәр итте. Кафега «ашыгыч ярдәм» чакыртканнар.

«Мирас бүлү эшләре – күңелле әйбер түгел»

Гүзәл Вәлиева социаль челтәрдәге сәхифәсендә урнаштырган видеосында бу хәлләрнең 2022 елның декабрендә вафат булган ире Фәрхәт Ибраев мирасы аркасында килеп чыгуын сөйли.

Без бу бинаны арендага алып торабыз. Бу бина минеке һәм иремнеке. Монда иремнең кызының да өлеше бар. Хәзер бина минем һәм аның (Фәрхәт Ибраевның беренче никахыннан туган кызы – авт.) исемендә. Монда минем дә өлешем булу белән ул риза түгел. Аныңча, мин моннан китәргә тиеш. Мин моның белән килешмим. Суд утырышлары бара. Күрәсең, туйганнардыр, «рейдерский захват» ясамакчылар. Алар минем бизнесымны тартып алырга тели. Бина үзе генә акча китерми бит. Акчаны бизнес китерә… Бәлки, ул чакырткандыр, монда беркем берни әйтә алмый.

Мирас бүлү эшләре – күңелле әйбер түгел. Утырып, сөйләшеп хәл итәргә кирәк. Ул миннән бар нәрсәне дә тартып алмакчы, аңлыйсызмы. Күрәсең, ул мине озак еллар буе күралмаган. Фәрхәт үлгәннән соң, ел буе суд утырышлары бара. Без бу сорауны хәл итәчәкбез, закон, суд бар бит, – дип сөйли ул үзенең язылучыларына.

Гүзәл Вәлиева бу видеоларны халыкка таратуны сорый. Берничә мөселман блогеры, аңа теләктәшлек белдереп, Татарстан Республикасы Рәисе Рөстәм Миңнехановны, адвокатлар, блогерларны билгеләп, аларның игътибарын юнәлтә башлады.

Суд карарларыннан чыгып…

Ресторатор һәм отельер Фәрхәт Ибраев 2022 елның декабрендә вафат булды. Ул «Ханума» дип аталган хәләл кафелар һәм кунакханәләр челтәрен үстерде. «Пиросмани» грузин кухнясына да ул нигез салган, «Веселый Роджер» төнге клубы да аныкы иде, «Золотая гроздь» шәраб рестораны да. Фәрхәт Ибраевның «ИНЭЛК» һәм «ВИТТА» ширкәтләренең хәзерге оештыручысы һәм директоры – кызы Альбина Ибраева. Ул – 2005 елдан бирле бизнеста, матурлык салоны, йөк ташу, рестораннар өлкәсендәге бизнес белән шөгыльләнә. Шшул ук вакытта укыта да. Альбина Ибраева – филология фәннәре кандидаты, шәхси сайтыннан чыгып фикер йөрткәндә, элек В.Г. Тимирясов исемендәге инновацион университетта чит телләр кафедрасында эшли.

«Ханума» атамалы берничә кафе бар, суд утырышлары Бауман урамында урнашкан бина тирәсендә бара.

Вәлиева әйтүенчә, бина – аның иренеке булган «ИНЭЛК» ширкәтенеке, ә бизнес – Вәлиеваныкы. Алар килешү төзи, аренда, дәгъвалар булмаса, ел саен автомат рәвештә озайтып барылырга тиеш була. Фәрхәт Ибраев үлгәч, «ИНЭЛК», димәк, бина да аның кызыныкына әйләнә, бизнес Вәлиевада кала. Вәлиева әйтүенчә, ул аренда өчен түләвен дәвам иткән, әмма иренең беренче никахтан туган кызы белән аңлашу килеп чыкмый.

Вәлиева әле бу бинаның чынлыкта аның көче белән төзелгәнен, шулай булса да, аны тартып алырга теләмәвен, элеккечә эшләргә генә теләвен әйтә. Болар ни дәрәҗәдә дөрестер – анысы билгесез.

«Ханума»га килгән ирләр «аренда түләнмәде, ә аренда килешүенең срогы чыкты» дип бара.

Вәлиева әйтүенчә, каршы як аны суд карары нигезендә, приставлар белән түгел, ә «рейдерлык ысулы» белән басып алырга теләгән. «Ул минем шәрә килеш чыгып китүемне тели», – дигән ул бинаның хуҗасы турында.

«ИНЭЛК» компаниясе белән элемтәгә әлегә кереп булмады. Әмма «ИНЭЛК» шәхси эшмәкәр Гүзәл Вәлиева белән судлаша, арбитраж суд сайтындагы карарлардан чыгып, «ИНЭЛК»ның бу вакыйгага карата позициясен ачыкларга була.

2023 елда барган арбитраж судта Альбина Ибраева шәхсән үзе катнашкан. Ул суд утырышында Гүзәл Вәлиевага бинаны арендагы бирү турында килешүне юкка чыгаруны сораган. Дәлил итеп, килешүгә әтисе Фәрхәт Ибраевның имза куймавын, кемнеңдер аның өчен куюын әйткән. Әмма экспертиза имзаны Фәрхәт Ибраев куюын исбатлый алган. Аннары «ИНЭЛК» вәкиле, аренда килешүе дәүләт теркәвен узмаган, дип әйтергә теләгән, арендага алучы (Вәлиева) мәдәни мирас булган бинаны тиешле халәттә тотарга мөмкинлек бирми, дигән. Әмма суд моны да кабул итмәгән.

2023 елның декабрендә «аренда килешүе үз көчендә» дип табылган. Суд карары апелляциягә бирелгән, әмма апелляция Татарстан арбитраж судының карарын үз көчендә калдырган.

Вахитов районы судында да «ИНЭЛК» белән Гүзәл Вәлиева арасында эш каралган. «ИНЭЛК» Гүзәл Вәлиеваны милекнең бер өлешен фатирга әйләндерүдә гаепли, мәдәни мирас объкты булган бинаны боза, дип, аренда килешүен өзәргә теләгән. Әмма «ИНЭЛК» бу судны да оттырган.

Җавап көтәбез...

Мирас бүлешү вакыйгаларының асылына төшү өчен, Гүзәл Вәлиеваның ярдәмчесе Светлана белән элемтәгә кердек. «Төп проблема нәрсәдә иде?» – дигән сорауга ул, кыска гына итеп, болай диде:

Безне бу бинадан чыгып китәргә сорадылар. Алар безне анда законсыз урнашкан дип билгели. Без анда – закон нигезендә, югыйсә суд бездән ул бинаны бушатуны сорар иде.

Видеоларда аренда түләмәү хакында дә әйтелә.

Аренда буенча сорауны Гүзәл Габбасовнаның адвокатларына бирергә кирәк. Мин бу хакта берни дә әйтә алмыйм, – дип җавап бирде Светлана.

Каршы якның кем булуын сораша башлагач, Светлана башта юристлар, җитәкчеләре Тимур Игоревич (Гүзәл Вәлиеваның улы) элемтәгә чыгачак, дип ышандырса да, көн дәвамында шалтыратучы булмады. Гүзәл Вәлиева да, җавап көтүебезне белсә дә, аңлатмыйча калуны кулайрак күрде булса кирәк.

Туры эфирга реакция

Хәзер күп ызгышлар «туры эфир» форматында бара. Шуңа да бу вакыйгага социаль челтәрләрдә күпләп реакция калдырдылар.

Гүзәл Вәлиеваның язма һәм видеолары астында күп кенә блогерлар аны яклап язсалар да, бездән үзләренең исемнәрен бу вакыйга белән бәйләмәүне үтенде...

Видеолар астында фикерләрен белдерүчеләр арасында Гүзәл Вәлиеваның үзен гаепләп әйтүчеләр дә бар. Бер язылучы хәлләрне болай дип аңлата: «Шушы көннәрдә генә Совет районы судында утырыш булды. (Без Совет районында булган утырыш хакында әлегә мәгълүмат тапмадык, булган суд утырышлары хакында мәгълүмат югарыда тәкъдим ителде). Кызлары (сүз Фәрхәт Ибраев кызы турында бара – авт.) – дәгъвачы, ә Гүзәл Габбасовна җавапка тартылучы иде. Кызлары судта җиңеп чыкты. Гүзәл Габбасовна бинаны вакытында бушатмаган».

Фото: © социаль челтәрдән скриншот

«30 гыйнвардагы суд карары буенча бина кызыныкы булып санала. Күрәсең, ул монда ресторан булуга каршы. Приставларны көткәнче… бина хәзер үк кирәк. Нишләп Г.Г. бу хәлләргә закон ягыннан комментарий бирми. Бер генә сүз – «тартып алалар», «рейдер». Г.Г хөрмәт итсәм дә, бу очракта берни эшләп тә булмый» – дип тә гаҗәпләнүчеләр бар.

Фото: © социаль челтәрдән скриншот

«Аңлаешсыз видео, автор тарафыннан провокация кебек»;

«Безнең заманда болай була аламы? «Слово пацана» караганнармы? Суд повесткасы кайда? Суд приставлары кайда? Закон нигезендә булса, нигә шушы рәвешле?»;

«Казахстаннан сезнең өчен борчылып торам»;

«Оят», – кебек сүзләр язучылар бик күп. Ә кайберәүләр «бу хәлләр – реклама ысулы» дип ышандырырга тырыша. «Сценарийны «Женщина Оххонь» биргән. Бу егетләр аның янында чәй эчә», – дип тә уртаклашкан берәү, кычкырып көлү смайлы куеп.

Искәртеп үтик, «Женщина Оххонь» – Чистай блогеры Гүзәл Хөснетдинова. Ул тавыш-гауга кузгата торган видеолар, проектлары белән танылды, федераль каналларга да чыкты. Мисалга, аның бер проектында кеше үзенә кабер казып, төне буе шунда ятып чыгарга тиеш иде. Бүгенге көндә ул 5нче баласын тапты, юл һәлакәтендә һәлак булган сеңлесенең кызын тәрбияли.

Болай дип язар өчен сәбәп тә бар, чөнки кафелар хуҗасы Гүзәл Вәлиева блогерлык белән дә шөгыльләнә. Ул татар ашлары пешерергә өйрәтә торган видеороликлар төшерә. 16 гыйнвар көнне ул «подписчик»лары санын 100 000 итү турында хыяллануын сөйләгән. Язылучыларыннан аның сәхифәсенә күбрәк кеше чакыруларын үтенгән. Ноябрьдә аның – 20 000, гыйнвар аенда аның 55 000 язылучысы булса, бүген аңа 64 000 артык кеше язылган. Бүген аңа бик комментарийлар килә, лайклар куялар, видеолары йөзләгән мең карау җыя.

Эчке эшләр министрлыгының матбугат хезмәтенә чыгып, бу вакыйга турында комментарий алырга теләгән идек, әмма алар җавапның соңрак булачагы хакында хәбәр итте.

Бу вакыйганы күзәтеп барачакбыз.