Россия Үзәк сайлау комиссиясендә Дәүләт Советына депутатлар сайлауга әзерлекне сөйләделәр
Татарстанда Республика парламентына депутатлар сайлауга әзерлек кысаларында 25тән артык мәгълүмати проект тормышка ашырыла. Бу хакта Россия Үзәк сайлау комиссиясе утырышында республиканың Үзәк сайлау комиссиясе Рәисе Андрей Кондратьев сөйләде. Татарстан бердәм тавыш бирү көненә әзерләнә. 2760 участок сайлау комиссиясе эшли башлады. Болар белән беррәттән сайлаучыларга тавыш бирү турында мәгълүмат җиткерү эше дә алып барыла. Төрле форматлар кулланыла. Алар арасында «ТНВ» телеканалында телемарафон, сайлаучылар форумы, сайлау хокукы мәктәбе һәм башка бик күп төрләр бар.
Иң масштаблы проектларның берсе булган «Сайлаучы көннәре» республика шәһәрләрендә һәм районнарында даими уздырыла. Аның соңгысы 13 августта Яшел Үзәндә узды.
«Бу көннәр кысаларында сайлау участокларының тавыш бирүгә әзерлеген тикшерәбез, җирле актив гражданнар белән очрашулар уздырабыз, сайлаучыларның сорауларына җавап бирәбез. Беренче тапкыр тавыш бирүче һәр сайлаучы шәхси чакыру ала», – дип сөйләде Андрей Кондратьев.
Сайлаулар турында өстәмә мәгълүмат бирә торган тагын бер проект – «ИнформУИК». Быел аны модернизацияләгәннәр: зур шәһәрләрдәге сквер-паркларда, сәүдә үзәкләре алдында активлык нокталары оештырганнар. Сайлау комиссиясе әгъзалары сайлау турында буклетлар тарата, тавыш бирүдә катнашу турында мәгълүмат бирә.
Татарстан Үзәк сайлау комиссиясе оештыра торган «Минем тавыш» сайлаучылар форумы республикадагы сайлау процессы турында актуаль дискуссияләрнең уникаль мәйданчыгына әйләнде.
«Форум уза торган көннәрдә сайтка 50 меңгә кадәр керү теркәлә. Соңгы 2 сессия трансляциясен тулаем алганда 89 мең сайлаучы караган. Без сайлучылардан 60тан артык сорау алдык һәм аларга җавап бирдек. Безнең карашка, форум төбәкнең икенче кайнар элемтәсе булып бара», – диде Татарстанның Үзәк сайлау комиссиясе рәисе.
«Бөтен гаилә белән сайлыйбыз» республиканың масштаблы проектына булды. 8 сентябрьдә, Бердәм тавыш бирү көнендә «ТНВ» телеканалында масштаблы телемарафон узачак. Татарстан Үзәк сайлау комиссиясе өстәмә рәвештә күпбалалы гаиләләр арасында видеороликлар бәйгесе уздыра. Уңай нәтиҗә булды инде. Ел башында беренче бәйге игълан ителде, дистәләгән гариза һәм сайлауларда катнашуның гаилә традицияләре турында видеоэшләр Татарстанның бөтен районнарыннан да килгән. Мондый беренче бәйгенең җиңүчеләре Ютазы районыннан Абрамовлар гаиләсе булды. Аларны Россия Үзәк сайлау комиссиясенә һәм 6 сентябрьдә мәгълүмат үзәге эшендә катнашырга чакырдылар.
«Элла Александровна, сездән һәм Россия Үзәк сайлау комиссиясе әгъзаларыннан сайлау системасы турында проектларның федераль бәйгесен уздыру мөмкинлеген сорап мөрәҗәгать итәсем килә. Бәлки, грант нигезендә була алыр, һәм ул Россия Үзәк сайлау комиссиясенең бәхәссез абруе аркасында уңышлы була алыр иде», – дип тәмамлады чыгышын Андрей Кондратьев.
Татарстан Дәүләт Советына депутатлар сайлау 8 сентябрьдә була. Барлык сайлау участоклары да иртәнге 7дән кичке 8гә кадәр эшләячәк.