Сәламәтлек саклау министры үбешмәскә кушты
Гыйнвар аеның икенче атнасыннан грипп белән чирләүчеләр саны арта башлаган. Шуңа да карамастан, күрсәткечләр эпидемия чигеннән 14 процентка түбәнрәк. Бүгенге көндә авыру очраклары арту – сезон белән бәйле гадәти күренеш. Татарстан Республикасында бүген ОРВИ белән авыручылар саны 16 меңнән арткан. Шуларның күбесе – мәктәп яшендәге һәм алардан кечерәк балалар.
Балалар бакчасында, мәктәптә яки сыйныфта авыручылар саны 20 һәм аннан күбрәк процент тәшкил итсә, карантин режимы кертелә. Казанда хастаханәләрдә дәваланучылар янына бару чикләнгән.
Татарстанда 1 млн кеше гриппка каршы прививка ясаткан. Бу вирусның массакүләм таралмавы өчен җитәрлек. Авыручылар арасында прививка ясаткан кешеләр юк.
Республикада халыкта «дуңгыз гриппы» дип йөртелүче H1N1 вирусы белән авыруның 14 очрагы теркәлгән. Шулардан 7се – балалар, 4е – авырлы хатыннар. Тукай районында гриппның әлеге төре белән авыручылар юк. H1N1 вирусы – гриппның иң куркыныч төрләренең берсе. Ул бик авыр кичерелә, икенче көнгә үк өзлегүләр бирергә мөмкин, бик тиз пневмониягә китерә. Гриппка ешрак балалар, авырлы хатыннар, шикәр һәм симерү чире белән авыручылар бирешә. Моны булдырмас өчен маска киеп йөрергә, кулны сабынлап юарга һәм мөмкинлек булганда өйдән чыкмаска кирәк. Республиканың сәламәтлек саклау министры Адель Вафин эпидимия чорында кочаклашулардан, үбешүләрдән, кул кысып исәнләшүләрдән баш тартырга киңәш итте. Вирус йоктырган кеше янына 1 метрдан да якынрак килергә ярамый. Предметлар өстендә (мәсәлән, ишек тоткычларында) вирус 2 сәгатьтән алып 8 сәгатькә кадәр яши.
Безнең тукайлылар бу авырудан ничек саклана микән?
Надежда Гуфранова, Круглое Поле мәктәбе директоры:
«Безнең мәктәптә укучылар, укытучылар һәм ашханә эшчеләре медицина маскалары киеп йөриләр. Барлык укучыларның да маска киюләрен таләп итәргә уйлап торабыз. Әлегә мәктәптә грипп белән чирләүче бер бала да юк. Шәхсән үзем көн саен суган, сарымсак ашыйм, туңмаска тырышам.
Миргасыйм Галимҗанов, Сәмәкәй авылы мәктәбе директоры:
«Грипптан саклану чаралары һаман да шул суган белән сарымсак инде. Көн саен ярты баш сарымсак ашыйм, спорт белән шөгыльләнәм, бүлмәләрне җилләтәм».
Финсилә Шәрифуллина, Шилнәбаш авылы мәктәбе директоры:
«Дүшәмбедән башлап мәктәптә барлык укучылар маскадан йөриләр. Линейкада һәрбер баланы тикшерәм, маскасы булмаса, үзем бирәм. 4 сәгать саен башлангыч сыйныф укытучылары маскаларны үтүклиләр, чөнки масканың файдасы 4 сәгатькә генә җитә. Балалар көн саен саф һавада уйныйлар, спорт белән шөгыльләнәләр».
Юлия Галишина, балалар сәнгать мәктәбе директоры:
«Мин октябрь аенда ук гриппка каршы прививка ясаттым. Шуңа ышанып йөрим, әмма барыбер өстәмә профилактика чараларын да күрәм. Сарымсак, суган ашыйм, имбирь белән чәй эчәм һәм гел яхшы кәефтә булырга тырышам».
Наил Вәлиев, Теләнче Тамак авылының тернәкләндерү интернат-мәктәбе директоры:
«Прививка ясату – профилактиканың иң ышанычлы чарасы. Шуңа да карамастан, халык медицинасы чараларын да читләтеп үтмәскә кирәк дим. Дөрес туклану, суган ашау да комачау итмәс».