Анимациллĕ фильмсем калăплама вĕрентеççĕ

Чăваш эпосне манма парасшăн мар. Республикăра пурăнакансене анимациллĕ фильмсем калăплама вĕрентĕç. Ку енĕпе «Чăвашмультфильм» пĕрлешӳ ĕçлĕ. Шăпах унта тăрăшакансем анимациллĕ кластер йĕркелеме культура пуçарăвĕсен Президент фончĕн грантне çĕнсе илнĕ. Унпа килĕшӳллĕн вĕсем вĕрентӳ курсĕсене йĕркеленĕ.

Çутă пӳлĕм, компьютерсем тата хальхи йышши техника хатĕрĕсем анимациллĕ фильмсем калăплама хăнăхас шухăш-ĕмĕтлĕ çынсене кĕтеççĕ. Çурхи вĕренӳ курсĕ шăпах пуш уйăхĕнче пуçланĕ. Унта çырăннисен шучĕ 16 çитнĕ ĕнтĕ. Ку вара ушкăн тулнине пĕлтерет. Чăваш Енре анимаци искусствине аталантарас шухăш Данил Шаликовăн тата унăн ĕçтешĕсен çуралнă. Пултарулăх ушкăнĕ пур ӳсемри çынна та хапăл тăвать. Вĕсене 3 уйăхра сценари ăсталăхне, графика дизайнне йĕркелеме, 3D мультфильмсем калăплама вĕрентĕç.

ГАЛИНА ЮРЬЕВА: «Чăваш мультфильм уçнă çын, Шаликов Данил вăл Элли Юрьев ученикĕ. Халь вăл унăн ĕçне аталантарасшăн. Çакăнта вĕренме килнĕ ачасене аталану сĕнетĕп, питĕ чаплă фильмсене кăларма сĕнетĕп».

Анимаци кластерĕн пайташĕсем мультишкулта вĕренекенсене наци культурин пуянлăхне упрама вĕрентесшĕн. Çавна май пысăк йыш пĕр ĕçпе тăрăшĕ – чăваш халăхĕн эткерлĕхне тата унăн эпосне тĕпе хурса мульфильмсем калăплĕ. Ăна çулталăк вĕçне хатĕрлесе пĕтерессе шантарççĕ. Анимаци искусствипе кăсăкланакансем çитес вĕренӳ курсне çырăнма пултараççĕ. Вăл çулла пуçланĕ. Тĕплĕнрех Интернет уçлăхĕнче, социаллă сетьсенчи «Чăвашмультфильм» ушкăнĕнче пĕлме пулать.