Медицина туризмне çул уçă
Патшалăх Думин депутачĕ, медицина туризмне аталантарассипе ĕçлекен ушкăн ертӳçин çумĕ Алла Салаева пуçарнипе Пĕтĕм тĕнчери медицина кластерĕн лапамĕнче Раççейри медицина центрĕн ертӳçисем ĕçлĕ тĕл пулу ирттерчĕç. Унăн тĕллевĕ – медицина туризмĕнчи çивĕч ыйтусене тишкерсе вĕсене уçăмлатасси.
Святослав Федоров академик ячĕпе хисепленекен куç микрохирургийĕ тата Сколковăри Пĕтĕм тĕнчери медицина кластерĕ – çĕршыври чи паллă центрсем шутланаççĕ. Кунта туристсем паха медицина пулăшăвне илме килеççĕ. Сколковăри центра çулсерен миллиона яхăн пациент сывлăхне тĕрĕслеттерет. Кунта çĕр-çĕр операци тăваççĕ. Патшалăх Думин депутачĕ Алла Салаева каланă тăрăх, ĕçлĕ тĕл пулура туризм инфратытăмне аталантарас енĕпе ĕçлекен комитетпа центрсене мĕнле пулăшу кирлине сӳтсе явнă.
«Медицина центрĕн ертӳçисем пирĕн ентешсем пулнишĕн мăнаçланатăп», – палăртнă Алла Леонидовна. Ĕçлĕ калаçу тухăçлă иртнĕ. Пухнă пĕлӳ Чăваш Енри медицина кластерне аталантарма та пулăшĕ.