Рут ясңат шавиман тайты ураңан
Курк тыӆащ хольмаң пеӆа нийӆмет хатаӆан Хон Петра вошан рут ясаң пиӆан рупитты хоятат Овс мув шимӆаң мир А. И. Герцен нэмпи институтан еңта пасан верыӆысат.
Там пуш таӆа щи йиӆ, хоты Софья Александровна Унру РГПУ А.И. Герцен Овс мув институт кущая уӆ. Хоты ӆув ястаӆ: «Муң ар рупата верӆув, ӆуӆан Овс мув шимӆаң мир няврэмат ашкуӆа юпийн муң хощаев утаӆтыты ёхтыӆысат. Тата хантэт, урат тумпийн нивхат, юкагират, эвенкат, эвенат, корякат па па хорпи мираң няврэмат уӆӆат. Тата рупитты нэңат па ёхат Арктика кашң мир эӆты уӆ. Щишан няврэмата кеншак утаӆтыты па уӆты ун вошан, хун ӆув мираң хоятаӆ уятаӆ. Кашң регион пиӆан рупитӆув. Организацияйт па кущайт пиӆан иса уйтантыӆув, потрэмиӆув хоты рупатаев еӆӆы туты. Муй хорпи верат няврэмат ураңан туңматты мосаӆ. Тамащ рупата онтасан муң ясаңӆув па уӆапсаев еӆӆы туӆэв».
Арпелак ёх, хой ёхатты ант верытас, онлайн трансляция щиран этӆысат. Ӆув кутэӆан кандидат педагогических наук, РФ заслуженный учитель Евдокия Андреевна Нёмысова. Потар тус хоты 5-9 классат ураңан ӆуңтапат рут ясңатан ХМАО-Югра ӆоватан этӆыӆат.
Наталья Ивановна Величко культурология кандидат, Институт развития образования дисциплина щиран уӆты кафедра доцент, IT-стойбище хоща уӆты няврэмат эӆты потартас. Хоты нумасӆа там хатӆатан щимащ ай куртаң ашкуӆайт аршак ХМАО-Югра хоща вертыя. Щи веран няврэмат рут ясңеӆ па ханты мир уӆапсаеӆ ант ёрэмаӆэӆ па еӆӆы туӆэӆ.
Любовь Геннадьевна Возелова ГАУ ЯНАО «Научный центр изучения Арктики» научный сотрудник потартас, хоты ӆув хощаеӆ монщат, потрат акатӆайт, мата харан щитат аӆ хоята уятты па вантты рахаӆ. Ӆув номас верас Овс мув нститутан утаӆтыты ханты няврэмат ЯНАО хуват ӆуң сыс экспедицияята тутӆыты.
Тамащ уйтантопсайт рут ясаң шавиты мирата шеңк мосӆат. Щита уӆам верат эӆты па газетаятан ханшӆам.