Күңел төшенкелегенә зарланган Илсөя Бәдретдиновага тамашачысы: «Тормыш иптәше кирәк сиңа»
Татарстанның атказанган артисты Илсөя Бәдретдинова үзенең күңел халәте турында сөйләгән. Күпләр көнләшерлек энергиягә ия җырчы кайвакыт үзенә тынычлык җитмәве, арып китүе хакында әйткән. «Хатын-кыз икәнем исемә төшә дә, елап та алам…», – дигән ул.
Әлеге сүзләргә видеосындагы җыры да ятып тора:
Ризык-суың җанга ятсын очен,
Алсу таңнар сызылып атсын очен
Яшәр өчен тормыш җырын көйләп
Күңелләргә тик тынычлык кирәк….
«Арасыңдыр шул. Синдәге энергия сокландыргыч бит. Командаң супер! Шулкадәр матур концерт карап кайттык. Юлларда имин йөрегез, җаным», «Төшкә кердең бүген! Барысы да яхшы булачак, ишет мине», – дип, хәленә кергән һәм тынычландырырга тырышкан җырчыны тамашачыларының бер төркеме.
Икенче төркеме исә күңел төшенкелеген җиңүнең бердәнбер ысулы – «ышанычлы, үзенә терәк булырлык тормыш иптәше табу» дигән фикердә. «Җир йөзендәге бөтен байлыкны аяк астына җыеп салсаң да, сине яраткан, аңлаган кеше алыштырмас», «Тиз арада тормышка чыгарга кирәк», – дип язалар алар Илсөягә.
Бер фанаты исә Илсөя Бәдретдинованы кияүгә алырга әзер булуын да белдергән. «Тормыш иптәше кирәк сиңа. Алам димен дә, дәшмисең бит», – дип язып куйган ул.
Искәртергә кирәк, «кияү егете» – Климент Бикматурзин дигән кеше җырчының бик күптәнге фанаты булса кирәк. Аның сәхифәсендә Илсөянең концертларыннан видеолар бихисап. Хәтта аватаркасында да Илсөя Бәдретдинова белән төшкән фотосы тора.