Гүзәл Уразова нәни кызының кырыс диетасы турында: «Тәмлене елап та, үтенеп тә сорый»
Гүзәл Уразова белән Илдар Хәкимовның кече кызы Арианада атопик дерматит һәм йомырка агына аллергия. Шул сәбәпле, баланы диңгезгә ешрак йөртергә тырышалар. Анда баланың, дарулар эчмичә дә, 3 көндә төзәлүе турында сөйләгән иде җырчы.
«Ариана кырыс диетада. Әлегә карабодай, брокколи, кәбестә, ташкабак, дөге ишене генә ашарга ярый. Ә аның иң яраткан ризыклары – ул шоколад, торт, бал, чипсы. Бу ризыкларны өстәлдә күреп калса, «кызым, бу сиңа ярамый, тегесе ярамый» дип әйтәбез. Ул, әлбәттә, безгә ачулана. Кайвакытта «зинһар өчен, берне генә» дип кычкырып елап та, үтенеп тә сорый.
Ә бу юлы төелгән кукуруз бөртекләрен (хлопья) үзе каяндыр табып алган да, без аңардан үтенеп сорагач, бездән көлеп, «юк» дип утыра. Ачу сакламый ул, ә хәтере әйбәт», – дип язган җырчы.
Видеоны караучылар сабыйны кызганып та куйган, шуңа бәләкәчнең сәламәтлеге тизрәк ныгуын теләгәннәр.