Владимир Павлов Мухар-Шэбэрэй багшанарые, һурагшадые амаршалба

Буряад Уласай Арадай Хуралай Түрүүлэгшэ Владимир Павлов Буряадай Толгойлогшо Алексей Цыденовтэй суг Мухар-Шэбэрэй юрэнхы болбосоролой 2-дохи дунда һургуулида баригдаһан залгаа байшанай нээлгын баяр ёһололдо хабаадаба. «Болбосорол» гэһэн үндэһэн түсэлөөр шэнэ байшан баригдаһан байна.

«Манай үхибүүдтэ, багшанарта һайн, зохид байдал зохёогдоно. Мүнөө үе сагай шэнэ һургуули соо һураха, хүдэлхэ арганууд бии болобо гээшэ. Буряад Уласай Арадай Хуралай, Засагай Газарай, мүн нютагай өөһэдын хүтэлбэриин урда һуралсалай байшангуудые шэнэлхэ, бариха зорилгонууд саг үргэлжэ табигдана», -гээд Владимир Павлов хэлээ.

Мухар-Шэбэрэй 2-дохи һургуулида нэмэлтэ байшан 75 һурагшадай һураха һууритайгаар баригдаһан байна. 1-дэхи дабхарта эдеэ хоол бариха газар, 2-дохи дабхарта һуралсалай кабинедүүд оршоно. Мүнөө үе сагай бүхы эрилтэдэ тааруугаар һургуулиин байшан баригданхай. «Болбосорол» гэһэн үндэһэн түсэлөөр 117 сая түхэриг һомологдоһон байна.

2017 онһоо эхилээд Буряад Уласта 35 шэнэ һургуули баригдажа, ашаглалгада тушаагдаад байна. 12 мянга гаран һууритай һургуулинууд мүнөө үе сагай бүхы эрилтэдэ тааруугаар зохеогдонхой гээд онсо тэмдэглэлтэй.

Оросой Холбооной Юрэнхылэгшэ Владимир Путинай дэмжэлгээр шэнэ һургуулинуудай барилга эрхилэгдэнэ. 2024 ондо 1738 һууритай үшөө 5 һургуули нээгдэхээр хараалагдана.