ნატო-ს მინისტერიალი - ერთობლივი კომუნიკე, რომლის 14-დან 4 პუნქტი საქართველოს ეთმობა
ნატო-ს მინისტერიალის მეორე დღეს მონტენეგრომ ალიანსში წევრობის მიწვევა ოფიციალურად მიიღო. მონტენეგრო 4 ასპირანტს შორის პირველი ქვეყანაა, რომელიც ალიანსს უერთდება. ამ გადაწყვეტილების გამოცხადების შემდეგ ნატო-ს ღია კარის პოლიტიკის შესახებ ალიანსის წევრი ქვეყნების საგარეო საქმეთა მინისტრების ერთობლივი კომუნიკე გამოქვეყნდა. დოკუმენტის 14-დან 4 საქართველოს ეთმობა.
ალიანსის წევრები ადასტურებენ, რომ ორგანიზაციას საქართველოც შეუერთდება და ამ პროცესის განუყოფელი ნაწილი წევრობის სამოქმედო გეგმაა. ჯეიმს აპატურაის შეფასებით, სრულყოფილი წევრობისთვის საქართველოს სჭირდება პრაქტიკული მომზადება და რეფორმების დასრულება, რაშიც მოკავშირეების სრული მხარდაჭერა აქვს.
ნატო-ს მინისტერიალში მონაწილეობას საქართველოს საგარეო საქმეთა მინისტრიც იღებდა. გიორგი კვირიკაშვილმა კომენტარი კომუნიკეზე გააკეთა.
„კომუნიკეში დადასტურებულია, რომ საქართველომ ძალიან მნიშვნელოვანი რეფორმები განახორციელა, როგორც სამხედრო კუთხით თავსებადობის ზრდის მიმართულებით, ასევე დემოკრატიული და პოლიტიკური რეფორმის მიმართულებით,“-განაცხადა გიორგი კვირიკაშვილმა.
საქართველოს საგარეო უწყების ხელმძღვანელი დღეს სერბეთში გაემგზავრა, სადაც ეუთო-ს მინისტერიალში მიიღებს მონაწილეობას.
ავტორები: თამარ ნუცუბიძე, თამარ ჭავჭავაძე, მალხაზ მეგრელიშვილი.