ՎԶԵԲ–ը ներկայացրել է Հայաստանին վերաբերող 2016–2020 թթ.–ի նոր ռազմավարությունը
Ըստ նոր ռազմավարության` հաջորդ չորս տարվա ընթացքում Եվրոբանկն առաջնահերթությունը տալու է մասնավոր հատվածի մրցունակության ավելացմանը, գործարար միջավայրի բարելավմանը, կապիտալի տեղական շուկայի զարգացմանն ու ենթակառուցվածքների զարգացման ֆինանսավորմանը։
«Այս տարի Հայաստանում տնտեսական աճը դանդաղել է տարածաշրջանային անկման ֆոնին, ինչն ազդել է երկրի վրա առևտրի ծավալների, դրամական փոխանցումների և ներդրումային հոսքերի նվազման միջոցով։ Բացի այդ, երկրի տնտեսության վրա ազդել են նաև հայկական դրամի արժեզրկումն ու արժութային պահուստների նվազումը», – նշվում է հաղորդագրության մեջ։
ՎԶԵԲ–ի փորձագետներն առանձնացրել են հիմնական առաջնահերթությունները տնտեսական աճն արագացնելու և կառավարության բարեփոխումների հավակնոտ ծրագրերին աջակցելու համար, որը նախատեսում է գործարար միջավայրի բարելավում։
Որպես առաջին առաջնահերթություն փորձագետները նշել են «Մասնավոր հատվածի մրցունակության ավելացումը», քանի որ փոքր և բաց տնտեսություն ունեցող երկրի համար մրցունակության էական բարելավումը ներդրումների ներգրավման առանցքային գործորն է։ Այսպիսով, ՎԶԵԲ–ը կշարունակի մասնավոր հատվածի ֆինանսավորումը` աջակցելով նորմատիվային և վարչարարական միջավայրի բարելավմանը, ինչպես նաև մակրո, փոքր և միջին ձեռնարկություններին ցուցաբերվող աջակցության ամրապնդմանը։
Երկրորդ առաջնահերթությունը «Կապիտալի շուկաների զարգացումն ու տեղական արժույթով ֆինանսավորմանն աջակցելն է»։ «Քանի որ իշխանություններն իրականացնում են պարտադիր կենսաթոշակային բարեփոխումներ, ապա կենսաթոշակային հիմնադրամի ներդրումների մեծ մասը լինելու է տեղական արժույթով։ Հաջողությունը հիմնականում կախված է լինելու տեղական շուկայում կապիտալի գործիքների առողջ առաջարկից, ինչպես նաև տարբեր ներդրողների բավարար թվից` շուկայում լիկվիդայնություն ստեղծելու համար», – նշում են ՎԶԵԲ–ից։
«ՎԶԵԲ–ը կաջացի բոլոր առևտրային կենսունակ նախագծերը էնեգետրիայի և էներգետիկ արդյունավետության, տրանսպորտի և մունիցիպալ ծառայությունների ոլորտներում` միաժամանակ մասնակցելով քաղաքական երկխոսությանը», – նշվում է փաստաթղթում։
ՎԶԵԲ–ը Հայաստանի խոշորագույն ներդրողներից է։ Երկրում իր գործունեության ընթացքում (1992 թ.–ից մինչև օրս) ՎԶԵԲ–ն իրականացրել է ավելի քան մոտ 950 մլն եվրոյի 140 նախագծեր տնտեսական բոլոր հիմնական հատվածներում ($1 – 482,93 դրամ)։ -0-