Րաֆֆի Հովհաննիսյան. Արցախի հարցը մենք շատ ենք ուշացրել
Արցախի հարցը մենք շատ ենք ուշացրել, հայտարարել է «Ժառանգություն» կուսակցության առաջնորդ Րաֆֆի Հովհաննիսյանը դեկտեմբերի 2-ին, Երևանի Ազատության հրապարակում ընթացող` «Նոր Հայաստան» ճակատի հանրահավաքում:
Որպես օրինակ, Հովհաննիսյանը բերել է արևմտյան երկրների օրինակը, որոնք ճանաչեցին Կոսովոն, բայց չեն ճանաչում ԼՂՀ-ն, ինչպես նաև Աբխազիան, որը ճանաչել է Ռուսաստանը, որը հանդես է գալիս որպես միջնորդ: Նա կոչ է արել պրոբլեմի արմատները փնտրել մեր մեջ, այլ ոչ թե այլ երկրներում: «Մենք պետք է ինքներս լուծենք այդ խնդիրը, այս շաբաթների ընթացքում»,-հայտարարել է Հովհաննիսյանը:
«Ժառանգություն» կուսակցության առաջնորդը կտրուկ քննադատել է նաև իշխանությունների քաղաքականությունը սահմանադրական հանրաքվեի կապակցությամբ, նշելով, որ «Այո»-ի շտաբի ձևավորման համար օգտագործվում են պետբյուջեի միջոցները: «Կուսակցական պետությունը պետք է ընկնի, իսկ նրա տեղում պետք է ծնվի ազատ Հայաստանը, որտեղ չեն լինի քաղբանտարկյալներ»,-նշել է նա:
Իր շուրջօրյա բողոքի ակցիաները «Նոր Հայաստանն» սկսեց դեկտեմբերի 1-ին, Ազատության հրապարակում: Ընդդիմադիր ուժերը հանդես են գալիս դեկտեմբերի 6-ին կայանալիք սահմանադրական հանրաքվեի անցկացմանը դեմ: