Beeline-ը եւ ՀՀ Քննչական կոմիտեն կհամագործակցեն
Հայաստանում Beeline-ը եւ ՀՀ Քննչական կոմիտեն ստորագրել են հուշագիր էլեկտրոնային փաստաթղթաշրջանառության կազմակերպման հարցերի շուրջ փոխգործակցության վերաբերյալ:
Beeline-ում նշել են, որ փաստաթուղթը նպատակ ունի բարձրացնել ընկերության եւ ՀՀ Քննչական կոմիտեի փոխհամագործակցության արդյունավետությունն ինտերնետ հասանելիության ծառայությունների, անձնական տվյալների եւ հեռախոսազանգերի վերծանումների մանրամասների վերաբերյալ տեղեկատվության տրամադրման հարցում:
«Հայաստանում կապի բոլոր օպերատորները դատարանների որոշումների հիման վրա Քննչական կոմիտեին տրամադրում են տարատեսակ տեղեկատվություն: Նախկինում հստակ կանոնակարգի բացակայության եւ փոստով առաքման պատճառով փաստաթղթերի տրամադրումը երկար ժամանակով երկարաձգվում էր: Նոր տեխնոլոգիաների եւ էլեկտրոնային փաստաթղթաշրջանառության ներդրման, ինչպես նաեւ գործընթացը կանոնակարգելու կողմերի պատրաստակամության շնորհիվ այդ ժամկետները կկրճատվեն հինգից տաս անգամ»,- նշել է Հայաստանում Beeline-ի գլխավոր տնօրեն Անդրեյ Պյատախինը։
Անվտանգության նկատառումներից ելնելով՝ ծրագրին հասանելիություն կունենա մեկ անձ՝ մեկ համակարգչի միջոցով։