«Նոր Հայաստանը» ԿԸՀ-ին կոչ է արել ցուցաբերել խելամտություն
«Նոր Հայաստան» ճակատը երթ է իրականացրել Երևանի կենտրոնական փողոցներով, որից հետո շարժվել դեպի Կենտրոնական ընտրական հանձանաժողովի շենք: Ակցիայի մասնակիցները ԿԸՀ-ին կոչ է արել ցուցաբերել խելամտություն և չմասնակցել սահմանադրական հանրաքվեի նախապատրաստմանը:
ԱԻՄ ղեկավար Պարույր Հայրիկյանը նշել է, որ հակառակ պարագայում ԿԸՀ-ն դառնում է հանցագործության մասնակից: «Դուք կատարում եք մի մարդու կամքը, որն իրականում արժանի է հրաժարականի»,-ասել է նա:
Իր հերթին, «Նոր Հայաստան» ճակատի քարոզչական շտաբի ղեկավար Ժիրայր Սեֆիլյանը հայտարարել է, որ եթե չկատարվի սահմանադրական հանրաքվե չանցկացնելու իրենց պահանջը, ապա ընդդիմությունը նոր քայլեր կձեռնարկի: «Այդ դեպքում մենք կկանգնենք այս շենքի մոտ ու չենք հեռանա այնքան ժամանակ, մինչև իշխող ռեժիմը հրաժարական չտա»,-ընդգծել է նա:
Իր շուրջօրյա բողոքի ակցիաները «Նոր Հայաստանն» սկսեց դեկտեմբերի 1-ին, Ազատության հրապարակում: Ընդդիմադիր ուժերը հանդես են գալիս դեկտեմբերի 6-ին կայանալիք սահմանադրական հանրաքվեի անցկացմանը դեմ: