Ստեփանծմինդա - Լարս ճանապարհը փակ է
«Իրավիճակի փոփոխության դեպքում՝ կտրվի լրացուցիչ տեղեկություն», - ասված է տրանսպորտի և կապի նախարարության լրատվական ծառայության հաղորդագրությունում։
Նույն աղբյուրի փոխանցմամբ՝ ժամը 14:30-ի դրությամբ Հայաստանի գրեթե ամբողջ տարածքում տեղում է առատ ձյուն:
Սաստիկ բքի և անբավարար տեսանելիության պատճառով խիստ դժվարանցանելի է Տիգրանաշենի (Քյարքի) լեռնանցքը: Տրանսպորտի և կապի նախարարությունը խորհուրդ է տալիս առայժմ խուսափել այս ճանապարհահատվածով երթևեկելուց:
Ուժեղ քամու և ցածր տեսանելիության պատճառով դժվարանցանելի են Հրազդան-Հանքավան, Աշտարակ-Արտաշավան, Սիսիան-Գորիս ճանապարհահատվածները, Թալինի, Արթիկի, Աշոցքի, Ապարանի, Արագածի, Սևանի, Գավառի, Մարտունու ավտոճանապարհները, ինչպես նաև Վարդենյաց և Մեղրու լեռնանցքները, Վարդենյաց լեռնանցքում տեղ-տեղ մերկասառույց է, ասված է հաղորդագրությունում:
Անվտանգ երթևեկությունն ապահովելու նպատակով ճանապարհաշինարարներն ավտոճանապարհներին կատարում են մաքրման և աղով, ավազով մշակման աշխատանքներ:
Միջպետական և հանրապետական նշանակության ավտոճանապարհները բաց են:
Վթարներից, պատահարներից և խցանումներից խուսափելու նպատակով, տրանսպորտի և կապի նախարարությունը վարորդներին խորհուրդ է տալիս երթևեկել բացառապես ձմեռային անվադողերով: