Кем иң яхшы иминиятләүче булачак?
Россия Пенсия фонды идарәсе “Мәҗбүри пенсия иминиятләве буенча иң яхшы иминиятләүче” VI Бөтенроссия конкурсы башлануы турында хәбәр итә.
Конкурста Пенсия фондына мәҗбүри пенсия иминиятләве взнослары түләүче иминиятләүчеләр катнаша ала. Анда катнашу өчен иминиятләүче иминият взносларын тулысы белән һәм үз вакытында пенсия фонды бюджетына күчерергә, шәхси учет һәм иминият взносларын түләү турында документларны үз вакытында тапшырырга, шулай ук үзенең барлык эшчеләрен мәҗбүри иминият өлкәсендә үз вакытында теркәргә тиеш. Моннан тыш, эш бирүчегә һәм иминиятләнгән затларга карата Россия Федерациясе пенсия законнарын бозу турында шикаятьләр булмаска тиеш.
Татарстан Республикасында конкурста җиңүчеләр дүрт категориядә билгеләнә: 500дән артык, 100дән алып 500гә кадәр, 100гә кадәр хезмәткәре булган эш бирүчеләр һәм ялланып эшләүчеләре булган шәхси эшмәкәрләр.
Конкурс нәтиҗәләре 2016 елның маенда ясалачак.
-“Иң яхшы иминиятләүче” конкурсы - эш бирүчеләргә иминият взносларын түләү мөһимлеген, аннан аның хезмәткәрләренең булачак пенсиясе бәйле булуын тагын бер мәртәбә искә төшерү, - ди район пенсия фонды идарәсе башлыгы Ринат Рәхмәтуллин.