მიხეილ სააკაშვილს საქართველოს მოქალაქეობა შეუწყდა
საქართველოს ყოფილი პრეზიდენტის მიხეილ სააკაშვილისთვის მოქალაქეობის შეწყვეტას ხელი პრეზიდენტმა მარგველაშვილმა რამდენიმე წუთის წინ მოაწერა.
"საქართველოს პრეზიდენტის 2015 წლის 4 დეკემბრის N378 ბრძანებულებით საქართველოს მოქალაქეობის შესახებ, საქართველოს ორგანული კანონის მე-19 მუხლის ბ ქვეპუნქტის, 21-ე მუხლის პირველი პუნქტის გ ქვეპუნქტისა და 25-ე მუხლის პირველი პუნქტის შესაბამისად, სხვა ქვეყნის მოქალაქეობის მოპოვებასთან დაკავშირებით, საქართველოს სხვა მოქალაქეებთან ერთად, საქართველოს მოქალაქეობა შეუწყდა მოქალაქე მიხეილ სააკაშვილს, დაბადებულს 1967 წლის 21 დეკემბერს", - აღნიშნულია პრეზიდენტის ვებ-გვერდზე გამოქვეყნებულ განცხადებაში.
სააკაშვილისთვის საქართველოს მოქალაქეობის გაუქმების რეკომენდაციით პრეზიდენტის ადმინისტრაციას იუსტიციის სამინისტრომ 3 დეკემბერს მიმართა.
სააკაშვილის მოქალაქეობის საკითხი დღის წესრიგში მას შემდეგ დადგა, რაც ის უკრაინის მოქალაქე გახდა და ოდესის გუბერნატორად დაინიშნა.