საქართველოს პრეზიდენტი პრემიერს უშიშროების საბჭოს სხდომის მნიშვნელობას ახსენებს
უშიშროების საბჭოს სხდომა დასრულებულია. პრეზიდენტმა ქვეყნის წინაშე არსებულ საფრთხეებზე ინფორმაცია შესაბამისი უწყებების პირველი პირებისგან მიიღო.
შეხვედრის დასრულების შემდეგ საქართველოს პრეზიდენტმა განაცხადა, რომ უშიშროების საბჭოს სხდომაზე ქვეყნის თავდაცვის მიმართულებით მნიშვნელოვანი საკითხების განხილვა მოხდა, ასევე დამტკიცდა რამდენიმე გეგმა და მოხდა შეთანხმება კოორდინირებულ მუშაობაზე.
დღევანდელ უშიშროების საბჭოს სხდომაზე საბჭოს სრული შემადგენლობით შეკრება ვერ მოხერხდა. პრეზიდენტის ადმინისტრაციაში დღეს არ მისულა საქართველოს პრემიერმინისტრი.
„უშიშროების საბჭო არის უმნიშვნელოვანესი კონსტიტუციური ორგანო, სადაც ქვეყნის უმაღლესი პოლიტიკური და სამხედრო პირები მსჯელობენ თავდაცვისუნარიანობის უმნიშვნელოვანეს საკითხებზე. ასეთ კონსტიტუციურ სხვა ფორმატს სადაც ასეთი მაღალი გადაწყვეტილებები არის მიღებული ჩვენ არ ვიცნობთ, ამიტომ მნიშვნელოვანია, რომ ამ შეხვედრებზე ერთიან პოზიციებზე ვიყოთ და ამ ერთიანობით გავაძლიეროთ ქვეყანა,“ - ასე უპასუხა პრეზიდენტმა პრემიერის სხდომაზე არმისვლის შესახებ დასმულ კითხვას.