Көнче сөяркә сөйгәнен машина белән таптый, кыйный һәм кызның машинасын сазлыкта батыра
Төмән өлкәсендә яшәүче ир-ат сөйгән кызын машина белән таптаган, аннары кыйнаган, шуннан соң кызның машинасын сазлыкка батырган. Бу турыда РЕН ТВ өлкә судларының берләштерелгән матбугат хезмәтенә сылтама белән хәбәр итте.
34 яшьлек ир-ат – эшмәкәр, хатыны белән аерылышкан, ярты ел чамасы бергә яшәгән сөйгән кызына өйләнергә җыенган. 2023 елның 8 июлендә ул сөйгәне һәм танышлары – ир һәм хатын белән бергәп, Муллаши авылы янындагы карьер янына ял итәргә килә.
Кичкә таба ир-ат кәләшен күз уңыннан югалта, аңа шалтырата башлый, тик кыз трубканы алмый. Ир-ат сөйгәнен эзләп китә. Лагерьдән 200 метр чамасы ераклыкта ул ак «Toyota Land Cruiser» машинасын күреп ала, салонда аның сөйгәне башка ир-ат белән бергә утыра. Ир-ат ярсый, сөйгәненнән үч алырга тели, машина ишеген тарткалый, ләкин йөртүче газга баса һәм кызны алып китеп бара.
Көнче ир-ат аларны куып тотарга була, ул әйберләрен җыя да кызның «Mitsubishi Pajero Sport» машинасына утырып китә. Ул юлда сөйгәнен очрата. Бераз алга таба китеп туктый, аннары артка таба бара башлый һәм кызны таптый. Аннары ул машинадан чыга, сөйгәнен куллары-аяклары белән кыйный, үтерү белән яный.
Аннары ир-ат лагерьгә кайтып китә, «Mitsubishi Pajero Sport» машинасын куып килгән килеш сазлыкка төшереп батыра.
Ләкин кыз тикшерүчеләргә башка версия сөйли. Ул бергә яши торган исерек иренең кимсетүеннән туеп, өенә кайтып китәргә була. Алар ял итә торган урынга якын җирдә аның танышы гаиләсе белән ял итә – кыз моны белә. Ул таныш ир-атка мөрәҗәгать итеп, шәһәргә кайтарып куюын сорый. Таныш ир-ат машинасына утыргач, алар янына көнче ир-ат килеп җитә, машина ишеген тарткалый. Ул машинага зыян китермәсен өчен, йөртүче читкәрәк китә. Кызны исә юл кырыенда төшереп калдыра.
Сөйгәнен кыйнаган, машинасын батырган көнче ир-атны 2,5 елга шартлы рәвештә ирегеннән мәхрүм иткәннәр һәм суд залында ук сак астыннан чыгарганнар, диелә хәбәрдә.