Հայաստանը կանդամակցի Եվրամիության COSME ծրագրին
2016 թ. հունվարի 1-ից Հայաստանը կանդամակցի Եվրամիության (ԵՄ) COSME ծրագրին, որի նպատակն է՝ 2014-2020թթ. ընկած ժամանակահատվածում ուժեղացնել ՓՄՁ-ների մրցունակությունը եւ կայունությունը:
Համապատասխան համաձայնագիր են ստորագրել այսօր Բրյուսելում ՀՀ էկոնոմիկայի նախարար Կարեն Ճշմարիտյանը եւ ԵՄ Ներքին շուկայի, արդյունաբերության, ձեռնարկատիրության եւ ՓՄՁ հարցերով հանձնակատար Էլզբիետա Բիենկովսկան:
Ինչպես հայտնել են ՀՀ էկոնոմիկայի նախարարության մամուլի ծառայությունից, Հայաստանը Արեւելյան գործընկերության երկրներից երկրորդն է (Մոլդովայից հետո), որը միանում է COSME-ին:
Միաժամանակ, Հայաստանը 7-րդ երկիրն է (Մոնտենեգրոյից, Մակեդոնիայից, Մոլդովայից, Թուրքիայից, Ալբանիայից եւ Սերբիայից հետո), որը չի հանդիսանում ԵՄ անդամ պետություն, սակայն միանում է ծրագրին:
COSME-ն աջակցելու է կանանց ներգրավածությանը ձեռնարկատիրական գործունեության մեջ, նվազեցնելու է ընկերությունների վարչական բեռը եւ բարձրացնելու է ԵՄ անդամ չհանդիսացող պետություններում ընկերությունների մտավոր սեփականության իրավունքների պաշտպանության մակարդակը:
COSME ծրագրի ընդհանուր բյուջեն կազմում է 2,3 մլրդ եվրո: