Фирүзә Хафизова Руслан Кираметдинов концертында: «Әллә тәвәккәлләп караргамы?»
Җырчы Фирүзә Хафизованы соңгы вакытта тамашачы Руслан Кираметдинов концертлары аша таный башлады. Җырчы алга таба үзе дә гастрольләр белән йөрергә җыена.
«Сторислардан күреп беләсез, инде 1 ай дәвамында мин иҗатташ дустым, бик талантлы, моңлы җырчы Руслан Кираметдиновның көтелгән, дулкынланып әзерләнгән концертларында чыгыш ясыйм. Татарстанның һәм Башкортстанның төрле төбәкләрендә узучы гастрольләрдә кадерле җырларымны яңгыратам.
Сер түгел, үз концерт программаңны булдырып, еллар буе сайлап тупланган җырларны тамашачыга тәкъдим итү, халык белән аралашу – һәр артист өчен чын илһам чыганагы да, зур җаваплылык та.
Мине хөрмәт итеп, иҗатымны югары бәяләп, концертларында катнашырга чакыруы өчен Русланга бик рәхмәтлемен! Безне олылап каршы алулары, алкышларга күмүләре өчен, тамашачыларга аеруча рәхмәт!
Әллә миңа да үз концертым турында уйланырга микән?.. Әллә тәвәккәлләп караргамы?» – дип сораган ул социаль челтәрдәге дусларыннан.
«Күптән кирәк инде», «Син булдырасың, Фирүзә, алга гына», – дип рухландырганнар җырчыны язылучылары.