«Ел укытучысы» җиңүчесе сәхнәдә сөйгәненә тәкъдим ясаган

Чаллыда узган «Ел укытучысы – 2025» бәйгесенең финалында күпләрнең хәтерендә калырлык бик күңелле мизгел булган. 13 мәктәп укытучысы Артур Кабышев, барлык катнашучылар, тамашачылар һәм килгән кунаклар алдында, үзенең сөйгәненә тәкъдим ясаган. Бу хакта «Челнинские известия» яза.

«Артур Кабышев инглиз һәм кытай телләре укытучысы. Аның сөйгәне Ирина да шушы ук мәктәптә рус теле һәм әдәбияты укытучысы булып эшли. Ул егетенә бәйгегә әзерләнергә дә ярдәм иткән. Алара арасында мәхәббәт уты да әлеге бәйгегә әзерләнү барышында кабынган, – дип яза басма.

Артур Кабышев тезләнеп: «Мин гомер юлымны синең белән үтәргә телим. Һәр көнебез онытылмаслык булсын иде. Гомерлеккә минеке бул», – дип, матур сүзләр әйткән, чәчәк бәйләме, йөзек бүләк иткән. Кыз тәкъдимгә «риза» дип җавап биргән.

Матур вакыйганың шаһитлары Артур белән Иринаны кайнар алкышларга күмгәннәр.