Җырчы Иркә кызының «ераграк, баерак илләрдә» яшәвен тели

Иркәнең «ВКонтакте» социаль челтәрендәге рәсми төркемендә җырчының үзе һәм кызы Айсылу белән әңгәмә урнаштырылган. Видео концерт вакытында төшерелгән.

Кадр артында алып баручы Иркәнең кызыннан сорый: «Син кая югалып йөрдең?» «Имтиханнар бирдем», – ди Айсылу. «Кем булырга укыйсың?» – дигән сорауга ул халыкара туризм юнәлешендә укуын әйтә.

Шул вакытта әнисе Иркә әңгәмәгә кушылып: «Ераграк, баерак илләргә китеп, Раббым, шунда гомерләрен үткәрсен, бәхете булсын. Шуннан миңа путевка гына җибәреп ятсын», – дип әйтеп куя.

Кызы кулы белән акча санаган кебек тә ишарәли.

«Син, әниең кебек, шөгылеңне концертлар белән бәйләрсең дип уйлаган идем, чөнки синең яхшы килеп чыга, – ди алып баручы. – Чөнки башка берәү дә синең кебек яхшы итеп Иркә белән аралаша алмый», – дип тә өсти. «Ул бит мине ярата», – дип җавап бирә Айсылу.

Шуннан соң алып баручы Айсылуга бер сер ача: «Игезәкләрнең берсе Айдарның сиңа күзе төшкән». «Айдар миңа ошый, минем әнигә дә ошады ул. Әни әйтә, теге игезәк егетләрнең берсен ничек булса да кияү ясарга инде, диде», – дип сүзгә кушыла Иркә.

«Шуның белән безнең әниятебез ахырына якынлашты», – дип сүзен тәмамлый Иркә.