Больш чым трасянка: жывая мова Беларусі, якой вы не чулі (видео)
Беларускую мову часта зводзяць да літаратурнай нормы або трасянкі, але яе сапраўдная карціна значна багацейшая — з дзясяткамі мясцовых гаворак, сотнямі адметных слоў і жывых моўных традыцый, што захоўваюць гісторыю і культуру розных рэгіёнаў краіны. Менавіта пра гэтую разнастайнасць мы прапануем згадаць сёння, 21 лютага, у Міжнародны дзень роднай мовы. Некалькі гадоў таму мы арганізавалі маштабную моўную экспедыцыю па Беларусі, каб зафіксаваць, як насамрэч гаворыць краіна: праехаўшы агулам каля 3300 кіламетраў, мы наведалі 15 населеных пунктаў ва ўсіх шасці гісторыка-этнаграфічных рэгіёнах і пагутарылі з 19 мясцовымі старажыламі, народжанымі паміж 1926 і 1949 гадамі. Мы размаўлялі толькі з карэннымі жыхарамі і запісвалі жывую народную мову — без падручнікаў і літаратурных норм, такой, якой яна існуе ў штодзённым ужытку.