Щаня мув эӆты уӆты учёной нэ
Курк тылащ хусмет хатаӆн Ёмвошн Обско-угорской институт хоща шоши рут ясӊатн диктант ханшса — «Фронтальный диктант на хантыйском, мансийском, ненецком языках».
Ханты ясаӊна щита учёной нэ Федосья Макаровна Лельхова (Лонгортова) диктант ӆуӊтас. Арпелак диктант ханшты ёх Ӆорвош район эӆты. Ин щита уӆӆат па рупитӆат.
Федосья Лельхова кандидат филологических наук па хантэт филология тахайн Обско-угорской институт хоща кущая уӆ. Ӆув 1991 таӆн Хон Петра вошн А.И. Герцен институтан утаӆтаты етшамаӆ. Щи щирн ӆув рущ ясаӊ па литература, ханты ясаӊ па литература щирн уӆты утаӆтыты нэ. Щи юпина ӆув Финляндия мувн Хельсинской университет кафедра финно-угроведения хоща хуӆам таӆ утаӆтымаӆ. Ин па еӆӆы ханты ясӊев кеша онтас туӆ.
– Там ханты ясӊаӊ диктант муӊ яӊ моӆтас таӆ верӆэв. Мет оӆаӊ пуш муӊ ӆувеӆ 2015 таӆн ӆэщатсэв. Тампуш ихосьяӊ таӆа йис хоты муӊ диктант ханшӆув. Кашӊ таӆ муӊ йи потар рущ ясаӊ эӆты уӆув па муӊ шоши ясаӊӆува толмащӆув па щаӆта диктанта ёхтам хоятӆува ӆуӊатӆув, — Федосья Макаровна ястаӆ. — Ма ванттэмн туняӆ таӆат эӆты ёхтам хоятӆув ямашак ханты ясаӊна диктантат ханшты питсат. Хоятат аршак ӆув рут уӆапсайӆаӆ пеӆа вантты питсат. Па ям щи хун муӊ ияха уйтантыӆув, еша рут ясӊевна потрэмиӆув, хор верӆув. Хоӆна ма толмащам потарӆам Ямкурта китыӆыӆӆам па щита хоятӆув ищи ханты ясаӊна диктант ханшӆат. Шеӊк ям, хун ясӊев нумман тайӆэв!
Иван Сандрин ханшам потар