АГIВЫТЛАНЫКЪВАКIГЬИ РГIАЛЬАМАТРА АЛАП
Къарча-Черкес Республика аунашвачпагIвчви ажвлара организацияква ргIащтийыгIвчви ранйараква цIасхатI. ХIреспублика а-Хъада йхъвдаквцIараква зырхъйауа ТЕМРЕЗОВ Рашид «Адыгэ Хасэ» жвлара организация аисполком йалу дрынйатI. Анйара йалан ауагIахъа уысквала, ажвлара коммуникацияквала йгьи печатьла КЧР аминистр КРАТОВ Евгений, ХIабаз йгьи АдыгьахIабльа муниципальна районква рхъадаква.
– ХIреспублика ажвлара организацияква зымгIва гьи хIрынйара хIгвыгъапI, ауат йрапшу айчважвараква агIвытланыкъвакI рыхъазлагьи сабапра алата йакIвшалитI. Анйараква рагIан авласть органкви ажвлара организациякви йхIзацалу ахачIвква лыхIхитI, ауи акъральгIвчва рыхъазла магIын ду амапI, – йгIаликIгIатI Темрезов Рашид.
Анйара апны акытква ртшауацIыхра йгьи зуыс джвыквызцIагIвацаз афермерква къральыгIва цхърагIара драдзарала амальква йрыквгIашIастI.
«Адыгэ Хасэ» агIащтийыгIвчва Сирия йгIатыцIыз артыгIвчва ршвъаква агвныргIврала йрыцкIра шатахъу гIалыркIгIатI йгьи ауат йырцхърагIара ахъазла август а 1 гвчIагIвра марафон шадыргалуа рхIватI. Ауи акIвымкIвагьи, анйара апны ачеркесква руагIахъа культура, рцIасква, рыбызшва хчарала йырхъйачIву ауысквагьи йрыквгIашIастI.