Ришат Төхвәтуллин: «Алияне өйдә бикләп тотасың, дип язалар. Мине бикләп тоталар өйдә!»
«Туган тел» каналы Мәскәүдә концерт уздырды. «Сер итеп кенә» тапшыруын алып баручы Роза Хәйруллина шушы концертта катнашкан җырчылар белән сөйләшкән. Шул исәптән, Ришат Төхвәтуллин һәм Алия Карачурина белән.
– Өйләнгән парга нинди сорау икәнен беләсез бит инде, – ди алып баручы Роза Хәйруллина.
– Әйе, – дип елмая Ришат.
– Ул сорау – «кайчан бәби була», – ди Роза Хәйруллина.
– Ришат, әле анысы да түгел. Үземнән чыгып беләм – беренчесен тапкач, «икенчесен кайчан табасыз» дип сорый башлыйлар, – ди алып баручы Роза Хәйруллина.
– Ришат үзгәрдеме, Алия?
– Юк. Тагын да ныграк мине ярата…
– Ришат, син нигә читкә карадың, Алия «ярата» дигәндә? – дип «орыша» Роза Хәйруллина.
– Ояла, – дип, ирен яклый Алия.
– Алия, сез Карачуринамы, Төхвәтуллинамы?
– Төхвәтуллина. Документта да, сәхнәдә дә мине шулай игълан итәләр, – ди Алия.
– Димәк, Карачурина дигән фамилия белән саубуллаштык?
Алия елмаеп кына тора.
– Ә Синдә нәрсә үзгәрде дип, нигә сорамыйсың? – дип сорый Ришат.
– Нәрсә үзгәрде күңелеңдә өйләнгәннән соң? – дип сорый Роза Хәйруллина.
– Барысы да шулай ук инде. Күңел тынычланды гына. Бар да урынында. Әллә нәрсә үзгәрде дип әйтеп булмый. Җаваплылык артты. Һәм… кич белән чыгып булмый, – ди Ришат.
– Әллә йөгерергә дә җибәрмиләр?
– Җибәрә-әм, – ди Алия.
– «Кайчан кайтасың», «нигә барасың»… Дуслар белән күрешергә дә гел сорап китәргә кирәк. Өйләнмәгән вакыттагы кебек чыктың киттең түгел…
– Җибәрәм бит инде барыбер, – ди Алия.
– Ришатның өйләнмәгән егетләргә сер ачуы булды бу, – ди Роза Хәйруллина.
– Миңа: «Ришат, нигә Алияне өйдә бикләп тотасың», – дип язалар. Менә мине бикләп тоталар өйдә! – ди Ришат.
– Әллә шулай диләрме?
– Мин «Алия гастрольгә бүтән йөрмәс инде» дигән идем. Шуңа халык котырды. «Нишләп бикләп тотасың, аңа әти-әнисе белем биргән, түләп укытканнар, ул шул белемен кулланырга тиеш. Чыгар аны! Өйдә тотма!» – дип язалар, – ди Ришат.
– Ни генә язып бетермәделәр, – дип җөпли Алия.
– Әй, тамашачылар безнең… Аларга инде шулай уйларга ирек кенә бир… – ди Роза Хәйруллина. – Юк, без сезне яратабыз, тамашачыларыбыз. Үз фикерләрегезне белгертегез. Сезнең бит инде, димәк, мәхәббәтегез бар, кызыксынасыз алар белән. Дөрес кабул итәбез… Димәк, монда әле Алия «кыскан» икән Ришатны әзрәк кенә, өйдә утырткан…
– Юк инде, – ди Алия.
– Бу – шаяру гына. Нәрсә үзгәрде, дигәннән, бөтен әйбер дә үз җаенда. Тынычлану бар, качырып йөрисе юк. Без очрашуыбызны күрсәтергә яратмый идек… Хәзер качып та йөрисе юк, кирәк тә түгел, – ди Ришат.
– Без аны сизә идек, – ди Роза Хәйруллина.
Бу хакта тапшыруның 24 минутында сөйли башлыйлар.