Раяз Фасыйхов тормыш иптәше турында: «Көнләшә инде ул»
«Шаян ТВ» телеканалындагы «Маршрутка» тапшыруында Татарстанның атказанган артисты Раяз Фасыйхов тормыш иптәше Люция белән тату, матур гомер итүләренең серен әйткән.
Аның фикеренчә, матур яшәүче һәр гаиләнең сере – гармониядә.
Ике кеше кавышалар да, бер-берсенең җитешсезлекләрен тулыландыралар, «пазллар»ны җыялар. Аллаһга шөкер, дөньяга балалар килә.
Люция ул – бик әйбәт хуҗабикә. Бик нык кеше ул. Ул – минем капма-каршым, дөресен әйткәндә. Мин – хисле, хыялый, урыны белән «очып йөри» торган, ышанучан, «ыштансыз син» дип тә әйтә инде хатыным миңа. Ә ул акыллы, сабыр. Безнең очракта, 90 процент гаилә учагын саклаучы – ул Люция.
Ул тормышта мондый урынны үзе сайлады. «Минем балаларның үскәнен күрәсем, алар белән шөгыльләнәсем килә», – диде. Һәр кешенең үз эше булырга тиеш. Бу – үзеннән-үзе көйләнә. Аеруча инде 17 елга якын бергә яшәгәндә, барлык моментларны да өйрәнәсең, – дигән Раяз Фасыйхов.
Җырчы сүзләренчә, янәшәсендә фанатлары, хатын-кыз коллегалары бик күп булса да, хатыны Люциянең башын югалтып көнләшкәне юк икән.
Ул бит инде тере кеше, миңа карата хисләре дә бардыр. Көнләшә инде ул, ләкин бу – тилереп көнләшү түгел, нормаль көнләшү. Ләкин мин аңа көнләшерлек сәбәпләр бирмәскә тырышам. Төрле моментлар булырга мөмкин тормышта. Әмма хатыным үзенең урынын беркем дә яулый алмаячагын белә, – дигән Раяз Фасыйхов.
Бу хакта җырчы тапшыруның 30:00 минутында сөйли башлый.