ՌԴ դեսպան. Հայաստանում ԵՄ առաքելությունը «վերածվել է ՆԱՏՕ-ի գործողության»
«Արեւմուտքի միջամտությունը տարբեր երկրների եւ տարածաշրջանների գործերին երբեք խաղաղ կարգավորման չի հանգեցրել։ Հարավային Կովկասում նրանց հիմնական նպատակը ոչ թե երկարաժամկետ եւ կայուն խաղաղության հասնելն է, այլ Ռուսաստանին դուռս մղելը, մեր տարածաշրջանում արհեստական բաժանարար գծերի ստեղծումը եւ, ի վերջո, Եվրասիայում ինտեգրացիոն գործընթացների խաթարումը», - ասել է ռուսաստանցի դիվանագետը ՌԻԱ Նովոստիին տված հարցազրույցում։
Նա ավելացրել է, որ առաքելությունը «հանդիսանում է արեւմտյան հիբրիդային պատերազմի գործիք», որը «հետախուզական տվյալներ է հավաքագրում Ադրբեջանի, Իրանի եւ Ռուսաստանի վերաբերյալ»։
«Ընդհանուր առմամբ, Հայաստանի ներկայիս արտաքին քաղաքականությունը մտահոգություն է առաջացնում այդ երկրի ապագայի համար։ Անվտանգության ոլորտում Արեւմուտքի հետ համագործակցությունը, որպես կանոն, ոչ մի լավ բանի չի հանգեցնում»,- նշել է Միխայիլ Եվդոկիմովը:
Դեսպանն ասել է, որ «դատելով կողմերի պաշտոնական հայտարարություններից՝ Ադրբեջանի եւ Հայաստանի միջեւ խաղաղ պայմանագրի նախագիծը գրեթե համաձայնեցված է»։
«Ինչպես նախագահ Վլադիմիր Պուտինն ընդգծել էր Ադրբեջան պետական այցի ժամանակ, Ռուսաստանը ուրախ կլիներ ներդրում ունենալ նրա կնքման մեջ։ Հուսով եմ, որ դա տեղի կունենա հնարավորինս շուտ, քանի որ դա կարեւոր քայլ կլինի Հարավային Կովկասում կայուն խաղաղության եւ բարգավաճման հասնելու համար»,- հավելել է դեսպանը: