Մերկելը 1983 թվականին Անդրկովկաս կատարած այցն «անմոռանալի» է անվանել
Անգելա Մերկելը «Ազատություն» հուշերում գրում է, որ 1983 թվականին ընկերների հետ «ուսապարկերով ճամփորդել է Հայաստանով, Վրաստանով եւ Ադրբեջանով՝ դա անմոռանալի շրջագայություն էր»։
«Այն ժամանակ ես նման էի սպունգի՝ կլանում էի այն ամենը, ինչը կարող էր ընդլայնել իմ հորիզոնները Արեւելյան Գերմանիայի սահմաններից դուրս: Պետք է ասեմ, որ հետաքրքրասիրությանս ու նոր գիտելիքների ծարավի պատճառով դոկտորական դիսերտացիայի վրա աշխատանքս ձգձգվեց»,- գրում է Մերկելը։
Նախկին կանցլերը 1983 թվականին Հայաստան, Վրաստան եւ Ադրբեջան կատարած այցի մասին այլ մանրամասներ չի ներկայացնում։
2019 թվականի նոյեմբերին Suddeutsche Zeitung թերթը հարցազրույց էր հրապարակել կանցլերի հետ՝ Բեռլինի պատի ապամոնտաժման 30-ամյակի առիթով: Անգելա Մերկելը, մասնավորապես, պատմել էր այն զգացողությունների մասին, որոնք ունեցել էր Գերմանիայի Դաշնային Հանրապետության առաջին այցելության ժամանակ:
«Հյուրանոցում ինքս ինձ հարց էի տալիս. արդյո՞ք կարող է միայնակ ճամփորդող կինն առանց վախենալու գիշերել Արեւմտյան Գերմանիայի հյուրանոցում: Ինձ համար դա իսկապես խնդիր էր, չնայած արդեն եղել էի Ռումինիայում կամ Հայաստանում, որտեղ հաստատ ավելի անվտանգ չէր», - պատմել էր Մերկելը: