Բլինքենը Ադրբեջանին կոչ է արել «անհապաղ ազատ արձակել» ակտիվիստներին եւ լրագրողներին
«Միացյալ Նահանգները կոչ է անում Ադրբեջանի կառավարությանը անհապաղ ազատ արձակել Ռուֆաթ Սաֆարովին, Սեւինջ Վագըֆգիզիին, Ազեր Գասըմլիին, Ֆարիդ Մեհրալիզադեին, Բախտիյար Հաջիեւին, Գուբադ Իբադօղլուին, Meydan TV անկախ հեռուստաալիքի վերջերս ձերբակալված աշխատակիցներին եւ շատ ուրիշներին, որոնք ձերբակալվել են մարդու իրավունքների ոլորտում իրենց աշխատանքի համար։ Միացյալ Նահանգները խորապես անհանգստացած է ոչ միայն այս ձերբակալություններով, այլեւ Ադրբեջանում քաղաքացիական հասարակության եւ ԶԼՄ-ների դեմ աճող ճնշումներով»,- ասվում է Բլինքենի հայտարարության մեջ:
«Մենք կոչ ենք անում Ադրբեջանի կառավարությանը ազատ արձակել մարդու իրավունքների պաշտպանության համար անարդարացի կերպով ձերբակալվածներին, դադարեցնել քաղաքացիական հասարակության նկատմամբ ճնշումները, հարգել մարդու իրավունքները եւ հիմնարար ազատությունները եւ կատարել Եվրոպայի անվտանգության եւ համագործակցության կազմակերպությանը անդամակցելիս ստանձնած պարտավորությունները», - ասել է ԱՄՆ պետքարտուղարը։