Агропромышленный комплекс таӆ сыс верам рупата эӆты
Таӆ сыс рупата эӆты па хоты яӆап таӆан верат манты питӆат АПК ЯНАО департамент куся ху Андрей Рубашин ясаң верас. Там таӆан округеван 2,6 сёрс тонна вуӆы нёхи масув. Вет таӆ сыс няӆъяң процента аршак нёхи хорты питса, 2% аршак верам ӆэтот.
2020-мет таӆан Ямал мув губернатор партам сирн вуӆы тащан яңхты хоятат нёхи тыныты охӆаӆ эӆатсайт. Сишан нёхеӆ аршак ӆэсятты па ар хорпи ӆэтотат верты питсайт, вуӆы ёх ӆув сирэӆан тайты вуӆы тащат аршака йисат, шитты охӆаӆ эӆатсайт. Мет ям, войң нёхеӆ 86% хойӆ. Округ эӆты яӆап таӆан эсаӆты охӆаӆан ӆэсятты ӆэтотат 75% унты эӆатӆа.
Там таӆан «Байдарацкий» совхоз па «Тазовской» сельхозпотребкооператив хон мувеван оӆаңмет па нэмоӆты хон мувеван симась тахайт ант тайты сертификат шитсат. «Органик» посан нёхеӆ постаман питаӆ.
Кашң таӆ округеван катхосьяң сёрс тонна хуӆ мосятӆа. Яң тыӆась сыс хуӆ ӆэсятты тахайт 2,8 сёрс тонна хуӆ ӆэтот ӆэсятсат. Хуӆ ӆэсятты тахайт яӆпитты па пормасат ӆутты ураңан округ эӆты охан эсаӆӆайт. 2026-мет таӆ унты хуӆ эӆты верты ӆэтотат кат пуша аршак верты питӆайт.
Нёхи ищиты няӆсот ветъяңан мийӆыӆат. Хор: Альбина Тырлина.
Округеван хуӆ веӆпасӆаты па нёхи маты тумпийн сельхозпредприятияйт вонсямот, нохар, толах маӆат, нянь верӆат, мисъйиңк па мисъйиңк эӆты ӆэтот ӆэсятӆат, ар хорпи щурнет энмаӆӆат. Яӆап таӆан округев эӆты симась предприятияйт субсидия охан нётӆайт. Ай куртатан нянь верты тахайт пуншӆайт.
Овс мувеван верты ӆэтотӆув хон мувев па па муватан ӆэтотат этаӆтыты тахаятан нох питӆат. Катсот пеӆа хольмаң округ ӆапкаятан Овс мув ӆэтотӆув тыныӆайт. Хуӆ па нёхи ӆэсятты тахайт ӆэтотӆаӆ округ садиката, ашкуӆаята, леккар хотата туӆайт. Там мосванан «Россия» вантопса-форуман таӆаң ӆапат округ предприятияйт пормасӆаӆ этаӆтысат.
Альбина Тырлина ханшам потар