Интернат нявремат наставник тайта питӆат
Ямал мув интернат нявремат, хой ашкоӆайна онттыда етсаӆ, наставник тайта питӆат. Хой вузатна па ссузатна онттантыда ӆэщатыйӆ, нэпекӆаӆ акатты па маты ораңна централизованной сбор ӆэщатӆа.
Онттыды пора ёхаттаӆна, нявремат, хой ащиӆаӆ, амыӆаӆ вутн касӆыман яңхлат, общежитие маса туӆайт па заселитта нятӆайт.
«Ма номастэмна, касаң няврем эӆты, интернат эваӆт эттаӆна, самаӆна ощта масӆ — ант ласкаӆа, па алңищ вантман тайта питӆа. Муң интернатна олмев хуват, йи минут щирӆуна анты хыщиӆысу, воспитателят касаң хатӆ муң хощңевна оллат, топ мала масӆ, муң аса ӆув эваӆтыӆаӆ инщисӆу. Щитна манэмна сэңк ям, муң па алңищ нятта питтэв, онттыда етсатэв маса наставник тайта питӆу, самна кон», — Охсар ашкоӆа-интернат етсаты Мария Русмиленко лавас.
Нявремат эӆты, хой щи арат таӆ интернатна ос па касаң хатӆ вантман тайсайт, вуӆ тахайт пеӆа онттыда мантэӆна сэңк щёкат онӆата. Итта, щитна там сопровождение, «дорожной карта» хоща лоңалса, нявремат эӆты, хой амыӆаӆ, ащиӆаӆ хувн оллат, нятта ат веритсайт. Ямал мув Губернатор партам щирна, щи ропата холна па ямми верта ӆытӆа.
Интернатат эваӆт этты нявремат пиӆна ропытты план, профильной ведомствайт па общественной организацияйт уйтантымеӆ юпина ӆэщатса.
Вера Лонгортова хансам потар