Казан үзәгендә авариядә Самара өлкәсеннән килгән өч кеше һәлак булган
Дәүләт автоинспекциясе узган ял көннәрендә Казанның Петербург һәм Назарбаев урамнары чатында булган юл-транспорт һәлакәтенең видеосын чыгарды.
«Татар-информ» хәбәр иткәнчә, Lexus автомобиле йөртүчесе Назарбаев урамы юнәлешендә хәрәкәт иткәндә «Уңга таба хәрәкәт» билгесе таләбен үтәми һәм зур тизлектә бетон коймага бәрелә. Бәрелүдән соң автомобиль әйләнеп каплана һәм янәшәдә тукталып торган биш машинага зыян килә. Һәлакәттән соң машинага ут каба.
Авариядә Lexus йөртүчесе һәм ике пассажиры урында ук һәлак була. Дәүләт автоинспекциясендә аларның өчесенең дә Самара өлкәсендә яшәүчеләр булуын ачыкладылар.