Тэматычны эфір да 80-годдзя зняцця блакады Ленінграда і Міжнароднага дня памяці ахвяр Халакоста

27 студзеня на тэлеканале «Беларусь 3» да 80-годдзя зняцця блакады Ленінграда і Міжнароднага дня памяці ахвяр Халакоста адбудзецца спецыяльны паказ гульнявых і дакументальных стужак, тэлеверсій спектакляў беларускіх тэатраў.

Распачнуць тэматычны паказ на культурным канале ваенная мнагасерыйная драма рэжысёра А. Котта “Сёмая сімфонія”, якая распавядзе гісторыю падрыхтоўкі і выканання сімфоніі № 7 Дзмітрыя Шастаковіча ў блакадным Ленінградзе, і дакументальная стужка “Дыхаючы адным дыханнем…”, прысвечаная героям Ленінграда і ганаровым грамадзянам Санкт-Пецярбурга – альпіністу Міхаілу Баброву, алімпійскаму чэмпіёну ў акадэмічным веславанні Юрыю Цюкалаву, паэтцы Вользе Бергольц, скульптару Міхаілу Анікушыну, лётчыку-знішчальніку Васілю Харытонаву.

Дакументальны цыкл “Памяць зямлі маёй” пазнаёміць гледачоў з гісторыяй стварэння і значнасцю мемарыяльнага комплексу “Драмлёва”.

У 18:40 на культурнай кнопцы – мастацкі фільм, заснаваны на рэальных падзеях Вялікай Айчыннай вайны, “Помні імя сваё”. У цэнтры ўвагі – былая вязніца канцлагера і яе сын, якія на доўгія гады згубілі адзін аднаго.

“Беларусь 3” у рамках спецыяльнага паказу прапануе ўвазе гледачоў спектакль “Беражы мяне, каханая” Беларускага дзяржаўнага акадэмічнага музычнага тэатра і спектакль “Альпійская балада” Рэспубліканскага тэатра беларускай драматургіі.