Балаларды семіздіктен қорғау
Балаларға өздігінен дене салмағын қалыпты ұстау оңай емес. Сондықтанда ата-аналарының оларға көмегі, дәрігер-мамандардың мынандай ақыл-кеңестеріне назар аударғаны қажет.
Семіздіктің алдын алу үшін:
* Дұрыс тамақтанған жөн.
* Балалардың көбірек қозғалыста болуын, теледидар мен компьютер алдында көп уақытын өткізбеуін қадағалау керек.
* Шектен тыс көп ұйықтамағаны да абзал.
Балалардың дұрыс таңдау жасауы:
* Оны ең бірінші, ата-анасынан үйренеді. Сол үшін балмұздақ, конфет пен тәтті тоқаштардың орнына жеміс-жидек ұсыныңыз.
* Ішетін сұйықтығы да тәттісіз болсын: қара су, қантсыз шай, майсыздандырылған сүт.
* Шай мен кофеге қаймақ емес, майсыздандырылған немесе майлылығы төмен сүт қосыңыз.
* Салаттың да майлылығы төмен, майонезсіз болғаны дұрыс.
Физикалық белсенділігін арттырыңыз
1. Балаңыздың экран алдында 2 сағаттан ұзақ отырмауын қадағалаңыз. Теледидар қарау, компьютерде отыру, бейне (видео) ойындар ойнауын доғарту қажет.
2. Түстенгенде не кешкі асқа отырғанда теледидарды өшіріп қойыңыздар. Экранға қарап отырған бала шамасынан артық ішіп-жеп қойғанын аңғармай қалады.
3. Теледидарды көп қарайтын балалар ондағы жарнамалардан көрген пайдасынан зияны басымырақ тағамдарға әуес келеді. Осыны ескеріңіз.
4. Балаларыңыз физикалық белсенділікті қажет ететін ойындарды көбірек ойнасын. Доп қуалау, жүгіріп-секіру балаларыңыздың денсаулығы үшін бір орында тапжылмай отырып, компьютер ойнағаннан әлдеқайда артық әрі тиімді. Жасөспірімдер спортпен көбірек шұғылданғандары, спорттық үйірмелерге қатысқандары жөн. Баланың үлкендерге қарап өсетінін ескеріп, оларға үлгі болуға тырысыңыз. Өзіңіз де теледидардың алдында отырғанша, далаға шығып, спортпен айналысуды қолға алыңыз, көбірек қозғалыста болыңыз.
Дұрыс тамақтану
* Балаларға ас әзірлегенде оған қосылған әр өнімнің құрамы мен пайдалы қасиеттеріне басымдық беріңіз. Бұл өзіңіз үшін де қажет-ақ.
* Ет, балық, құс, бұршақ тұқымдастар, жұмыртқа мен жаңғақтарды көбірек тұтыныңыздар. Балаларыңыз да соған үйренеді.
* Құрамында май, холестерин, тұз, қанты көп өнімдерді тұтынуды азайтыңыз, балаларыңыз да солай жасасын.
* Қуырылған тамақтардың орнына суда, буда піскен тағамдарды тұтынғандарыңыз жақсы. Бұл барлық отбасы мүшелеріне, әсіресе, балаларға пайдалы.
* Суық сорпаны ысытар алдында бетіндегі майды қалқып алып тастаңыз.
* Ыстық тамақ дайын болғанша балаңыздың қарны ашса, тіске басарға басқа емес, көкөніс пен жеміс-жидек ұсыныңыз.
* Балаңызға құрамында тәттісі немесе майы көп өнімдердің денсаулыққа зиянды екенін түсіндіріңіздер.
Артық салмақ баланың психологиясына кері әсер етеді, ой-өрісін де тежейді, оқуға белсенділігін төмендетеді. Мұны естен шығармаңыз.