Кеше үлгән өйдә телевизор карарга ярыймы?
«Хозур» нәшрияты «Дин вә мәгыйшәт» редакциясенең «Дин турында. Сезнең сорауларга җавап» телеграм-каналында мәет булган өйдәге әдәпләр турында язганнар.
Мәет булган йортта телевизор карарга ярыймы?
Телевизор карау тыелмаган. Ягъни рөхсәт ителә.
Ләкин кеше үлсә, йортта тынычлык саклау (кычкырып сөйләшмәү, телевизор карамау, радио тыңламау) дөресрәк булачак.
Бүгенге көндә мәет озату болай да формаль характер ала башлады. Мәетне моргтан юып, туры зиратка алып китәләр. Бу, бер яктан караганда, туганнарга эшне җиңеләйтү. Ләкин, икенче яктан, безгә үлем һәм ахирәт турында уйларга сәбәпләр кими. Үлемнең никадәр якын булуын аңлау, ахирәт турында уйлау, үлгән кешегә хөрмәт йөзеннән рухына дога кылу өчен булса да, өйдә тынычлык сакларга тырышыгыз, диелә җавапта.