«Кара күлмәкле кәләш күргәнегез булмагандыр әле»: Ленария Мөслим кияүгә чыккан
Җәмәгать эшлеклесе, элек Бөтендөнья татар яшьләре форумы рәисе булып эшләгән Ленария Мөслимованың никахы булган. Хәзерге вакытта ул ТР Милли музеенда генераль директор урынбасары булып эшли. Ленария бәхетле мизгелләре белән социаль челтәрдә уртаклаша.
Яңа гаиләнең никах образына игътибар итмичә мөмкин түгел. Алар икесе дә кап-карадан киенгән. Ленариянең кулында ап-ак чәчәкләр. Кулга-кул тотынышып, мәчеттә төшкән фото астына ул: «Гаилә», - дип язып куйган.
«Кара күлмәкле кәләш күргәнегез булмагандыр әле. Мине хуплавы һәм ышанычы өчен иремә рәхмәт! Барыгызны да яратам, кочаклыйм, котлауларыгыз өчен рәхмәт», – дип яза Ленария!
Гаиләгә бәхет теләп, бик күп матур сүзләр язганнар!
Котлыйбыз! Бәхетле гаилә тормышы тәлибез!