Зөлфирә Шәйдуллина кайнанасы һәм кайнатасы белән мөнәсәбәтләре турында сөйләгән

Җырчы Зөлфирә Шәйдуллинага иҗаты һәм шәхси тормышы белән кызыксынучы дуслары берсеннән-берсе кызыклырак сораулар яудырганнар. Ул аларга сорау-җавап сәхифәсендә җавап бирә.

Сез – бик талантлы, искиткеч тавышлы җырчы. Әмма, җырчы булмасагыз, кем булыр идегез?

Кеше күңелен дәвалый торган берәр эштә эшләр идем. Бу артист эшебезне дә нәкъ шундый эш итеп кабул итәм. Концерттан соң күңелләренә рәхәтлек алсалар, өйләренә кайткач, гади генә әйбергә дә башкача карый башласалар. Төшенкелектән чыгарга булышсак. Җырларыбызны тыңлап, җаннарына рәхәтлек алсалар, димәк, миссия үтәлә.

Күлмәкләрегез искеиткеч матур, фасонын кем уйлап таба?

Минем телефонның хәтере костюм фотолары белән тулган, дисәм, дөрес булыр. Гәүдәгә туры килердәй күлмәк фасоннары сайларга тырышам. Үземә дә, төркемдәге егет-кызларга да. Шәрәлекне яратмыйм. Ябыкмы ул, тазамы ул. Просто яратмыйм.

Бу сезонда бер күлмәгем бар. Бик яратып алган идем. Бер як иңбашы ачык. Кигән саен үземне шәрә кебек хис итәм. Ә үзеннән ни күкрәк, ни к...т, ни аяк күренми.

Кайнана һәм кайнатагыз белән мөнәсәбәтләрегез нинди?

Мин үземне алар янында чит гаиләдән килгән кеше итеп хис итмим. Әтине дә, әнине дә бик яратам. Мин аларга бик рәхмәтле. Сез күз алдына да китерә алмыйсыз аларның нинди талантлы, эчкерсез, гадел егет үстергәннәрен!

Начар әти-әнидән алтынга тиң балалар тумый. Һәм мин моны бер арттырусыз әйтәм.

Нәзирәгә иптәш алып кайтасыгыз килмиме?

Аллаһы Тәгалә күпме насыйп иткән, шулкадәр булыр. Безнең очракта бу эшне планлаштырып булмый. Сау гына булсыннар, – дип җаваплар язып калдырган җырчы.