Быел фитр һәм фидия сәдакалары нинди күләмдә билгеләнгән?
28 февральдә, кояш баегач, изге Рамазан ае башлана. Уразаның беренче көне итеп 1 мартны, соңгы көне итеп 29 мартны санарга кирәк. Соңгы тәравих 28 мартта укыла. Ураза гаете 30 мартка туры килә.
2025 елга фитр сәдакасы күләме:
аз керемлеләр өчен 250 сум;
уртача керемле кешеләр өчен 800 сум;
байлар өчен 1300 сумнан башлана.
Фитр сәдакасының күләме хәдисләрдә искә алынган хөрмә, арпа, бодай һәм йөзем кебек азык-төлек продуктларының уртача бәясеннән чыгып исәпләнә. 250 сум минималь һәм аны түләү мәҗбүри. 800 сум һәм 1300 сум – түләргә тәкъдим ителә торган сумма. Кеше, әгәр тели икән, күбрәк түләргә хокуклы.
Җитди сәбәпләр аркасында ураза тота алмаган кешеләр фидия сәдакасы түли. Аның минималь суммасы 400 сум дип билгеләнгән. Бу сумма, ашауга тотылган тәүлеклек уртача чыгымнарга бәйле рәвештә, арттырылырга яки киметелергә мөмкин.
Еллык зәкят чыгару буенча нисаб күләме – 743 300 сум, дип хәбәр ителә Россия мөселманнары Диния нәзарәте сайтында.