Чулпан Йосыпова әтисенең хәле турында сөйләгән

Кичә Чулпан Йосыпова әтисенең реанимациягә эләгүе турында хәбәр иткән иде. Җырчы сәбәпләрен әйтмәде. Әтисенең бүгенге хәле турында ул социаль челтәрдә сөйләде.

• Чулпан Йосыпованың әтисе реанимациягә эләккән

«Реанимациядән шалтыраттылар. Бүген сәгать 1дә әтине реанимациядән палатага күчерәләр, Аллаһка шөкер», – дип сөйләгән ул иртәнге якта.

Иртән җырчы үзе студиягә әтисенә багышланган җырны яздырырга барган. 16 февральдә әтисенә 75 яшь тула. «Әтине шул җыр белән сөендерәсем килә. Бүгенгә кадәр әтигә багышлаган җырым юк иде, ә ул минем тормышымда бик зур роль уйнаган кеше. Гомумән, мин әти кызы булып үстем», – ди җырчы.

Җырны яздырганнан соң, ул әтисе янына хастаханәгә барган. Әтисен палатага күчергәннәр.

«Кичә шундый авыр көн булды, бер мизгелдә әллә ниләр уйлап куясың. Аллаһка шөкер, бүген хәле яхшы. Исән-сау терелеп кенә чыксын. Вакытында кадерне белик, дип күпме генә кабатласак та, кайчак әллә онытабыз шуны, әллә нәрсә...» – дип яза ул.